Արևմտյան Աֆրիկայի երեք երկրների՝ Բուրկինա Ֆասոյի, Մալիի և Նիգերի իշխանությունները որոշում են կայացրել ձևավորելու Սահելի պետությունների համադաշնությունը: Այդ մասին հայտնում է Agence France-Presse-ը՝ հղում անելով այդ պետությունների ղեկավարների հայտարարությանը։ 

Հայտարարության մեջ ասվում է, որ երեք երկրները «որոշել են ևս մեկ քայլ կատարել դեպի ավելի մեծ ինտեգրում»:

«Այդ նպատակով նրանք Բուրկինա Ֆասոյի, Մալիի և Նիգերի միջև համադաշնության ստեղծման մասին պայմանագիր են կնքել»,-ասված է փաստաթղթում, որից մեջբերում է արել ֆրանսիական գործակալությունը:

Նման որոշման ընդունումը տեղի է ունեցել Նիամեյում կայացած Սահելի պետությունների դաշինքի առաջին գագաթնաժողովի արդյունքներով, որի աշխատանքներին մասնակցել են Բուրկինա Ֆասոյի, Մալիի և Նիգերի ղեկավարները:

Ավելի վաղ՝ 2024 թվականի հունվարի 28-ին, Բուրկինա Ֆասոն, Մալին և Նիգերը հայտարարեցին Արևմտյան Աֆրիկայի երկրների տնտեսական համայնքից (ECOWAS) հնարավորինս արագ դուրս գալու մասին համատեղ որոշման մասին, որը, նրանց կարծիքով, «գտնվում է օտար տերությունների ազդեցության տակ՝ անդամ պետությունների և նրանց ժողովուրդների համար վերածվելով սպառնալիքի»։ 

Լուսանկարը՝ Նիգերի նախագահի պաշտոնակատարի մամուլի ծառայության