Ռուսաստանի նախագահ Վլադիմիր Պուտինն ու Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել Իրանի նորընտիր նախագահ Մասուդ Փեզեշքիանի հետ։ Այդ մասին նշվում է Կրեմլի ու Թուրքիայի նախագահի աշխատակազմի տարածած հաղորդագրություններում։ 

Մասնավորապես թուրքական կողմը նշում է, որ Էրդողանը Փեզեշքիանին վստահեցրել է, որ երկու երկրների հարաբերությունները կշարունակեն զարգանալ։

«Քննարկվել են թուրք-իրանական երկկողմ հարաբերությունները, տարածաշրջանային և գլոբալ հարցեր: Էրդողանը հայտարարել է, որ հավատում է, որ նոր ժամանակաշրջանում Թուրքիայի և Իրանի հարաբերությունները կշարունակեն զարգանալ բոլոր ոլորտներում, և որ դրանք ուժ են քաղելու իրենց խորը պատմական արմատներից: Թուրքիայի նախագահը շնորհավորել է Փեզեշքիանին ընտրություններում տարած հաղթանակի կապակցությամբ և հաջողություն մաղթել նոր պաշտոնում»,- ասված է պաշտոնական Անկարայի տարածած հաղորդագրության մեջ։

Կրեմլն էլ փոխանցում է, որ Պուտինը հեռախոսազրույցի ընթացքում շնորհավորել է Փեզեշքիանին ընտրության կապակցությամբ և աշխատանքում հաջողություն մաղթել։

«Ռուսաստանի Դաշնության նախագահ Վլադիմիր Պուտինը հեռախոսազրույց է ունեցել Իրանի Իսլամական Հանրապետության նորընտիր նախագահ Մասուդ Փեզեշքիանի հետ: Վլադիմիր Պուտինը շնորհավորել է Փեզեշքիանին նախագահական ընտրություններում տարած հաղթանակի կապակցությամբ և հաջողություն մաղթել պատասխանատու պետական պաշտոնում»,- նշվում է Կրեմլի տարածած հաղորդագրոթյան մեջ։

Ռուսական կողմի փոխանցմամբ՝ կողմերը գոհունակություն են հայտնել երկու երկրների հարաբերությունների բարձր մակարդակից և վերահաստատել հետագա աշխատանքի պատրաստակամությունը: «Երկուստեք գոհունակություն է հայտնվել ռուս-իրանական բարիդրացիական հարաբերությունների բարձր մակարդակի կապակցությամբ և հաստատվել է տարբեր ոլորտներում փոխշահավետ համագործակցության հետագա զարգացման ուղղությամբ համատեղ սերտ աշխատանքի պատրաստակամությունը»,- ասված է հաղորդագրության մեջ:

Լուսանկարում՝ Իրանի նորընտիր նախագահը/The Associated Press գործակալություն