ԱՄՆ Հանրապետական կուսակցությունը երկուշաբթի կայացած համագումարից հետո ընդունված փաստաթղթում հայտարարել է, որ նախագահի պաշտոնում Դոնալդ Թրամփի ընտրման պարագայում կուսակցությունը կիրականացնի ԱՄՆ պատմության մեջ ներգաղթյալների ամենախոշոր արտաքսումը:

«Խոստանում ենք դադարեցնել միգրանտների շրջանում հանցավորության համաճարակը, ոչնչացնել օտարերկրյա թմրակարտելները, ճնշել ավազակությունը, բանտարկել հանցագործներին։ Խոստանում ենք արտաքսել ՀԱՄԱՍ-ին աջակցող արմատականներին և մեր համալսարանական մասնաշենքերը կրկին դարձնել անվտանգ և հայրենասեր»,- ասված է հանրապետականների հայտարարության մեջ։ Նրանք սա պատրաստվում են կատարել ոչ միայն Սպիտակ տուն վերադարձից, այլև Ներկայացուցիչների պալատում և Սենատում մեծամասնություն կազմելուց հետո։

Այլ կետերի թվում են «արմատական գենդերային գաղափարախոսությունը խթանող դպրոցների դաշնային ֆինանսավորման կրճատումը», «կանանց սպորտաձևերում տղամարդկանց մուտքի արգելքը», «երկրի միավորումը», «ընտրությունների անվտանգության ապահովումը», «գնաճին վերջ տալու» խոստումը և այլն: Այս բոլոր խոստումների համար չեն ներկայացվել գործողությունների հստակ ծրագրեր։

ԱՄՆ Հանրապետական կուսակցության պլատֆորմը ներկայացնում է հիմնական սկզբունքների, նպատակների և քաղաքական դիրքորոշումների մի շարք, որոնք կուսակցությունը մտադիր է իրականացնել: Սովորաբար, փաստաթուղթը վերանայվում և թարմացվում է չորս տարին մեկ՝ արտացոլելու ընթացիկ առաջնահերթությունները և հասարակական կարծիքի փոփոխությունները:

Լուսանկարը՝ Andrew Caballero-Reynolds/AFP/Getty Images