Հայաստանն ու Ադրբեջանը միմյանց մեղադրում են Լոնդոնում հանդիպումից հրաժարվելու մեջ։ Ադրբեջանի նախագահի օգնական Հիքմեթ Հաջիևը ադրբեջանական Report գործակալությանը հայտարարել է, թե հայկական կողմը հրաժարվել է Լոնդոնում Եվրոպական քաղաքական համայնքի IV գագաթնաժողովի շրջանակներում Ադրբեջանի և Հայաստանի ղեկավարների հանդիպում անցկացնելու Մեծ Բրիտանիայի առաջարկից: 

«Մեծ Բրիտանիան հանդես է եկել նման հանդիպման առաջարկով, առաջարկվել էր այն անցկացնել Մյունխենի անվտանգության համաժողովում Ադրբեջանի նախագահի և Հայաստանի վարչապետի միջև կայացած հանդիպման ձևաչափով: <...> Սակայն հայկական կողմը հրաժարվել է դրանից»,- ասել է Հաջիևը։

Բաքուն Երևանի այս որոշումը համարում է «խաղաղության պայմանավորվածություններից նահանջ»։ Հաջիևը հավելել է, որ Մյունխենի համաժողովի ձևաչափով Գերմանիայի կանցլեր Օլաֆ Շոլցը սկզբում մասնակցել է հանդիպմանը, իսկ հետո այն շարունակվել է երկկողմ ձևաչափով։ Ըստ ադրբեջանցի պաշտոնյայի՝ բրիտանական կողմն այս անգամ նույնպես այդ ձևաչափն էր առաջարկում։

Հաջիևի հայտարարությունից մոտ մեկ ժամ անց հայկական կողմը հերքել է հանդիպումից հրաժարվելու վերաբերյալ Հաջիևի հայտարարությունը՝ պնդելով, որ ադրբեջանական կողմն է հրաժարվել այդ հանդիպումից։ ՀՀ արտաքին գործերի նախարարության մամուլի խոսնակ Անի Բադալյանը հայտարարել է, որ հայկական կողմն առաջարկել է Հայաստանի վարչապետի և Ադրբեջանի նախագահի երկկողմ հանդիպում ունենալ ՄԹ-ում ընթացող Եվրոպական քաղաքական համայնքի գագաթնաժողովի շրջանակներում, սակայն ադրբեջանական կողմը մերժել է առաջարկը։ ՀՀ արտաքին քաղաքական գերատեսչության ներկայացուցչի խոսքով՝ հայկական կողմի առաջարկն ուժի մեջ է։

«Հայկական կողմը նաև վերահաստատում է իր առաջարկը` ինտենսիվացնել բարձր և բարձրագույն մակարդակով բանակցությունները և մեկ ամսվա ընթացքում հասնել խաղաղության պայմանագրի ստորագրմանը»,- եզրափակել է Բադալյանը։

Լուսանկարը՝ ՀՀ կառավարության մամուլի ծառայության