Տեսանյութեր
Լուսանկարներ
Հայաստանի ԱԳՆ-ն արձագանքել է Ադրբեջանի պաշտպանության նախարարության հայտարարությանը
Հայաստանի արտաքին գործերի նախարարության մամուլի խոսնակը մեկնաբանել է Ադրբեջանի պաշտպանության նախարարության հայտարարությունը։
Ադրբեջանի ՊՆ-ն, ավելի վաղ, Հայաստանին մեղադրել էր սադրիչ գործողությունների մեջ, մասնավորապես վկայակոչելով հայ-ամերիկյան զորավարժությունները, Ֆրանսիայի կողմից Հայաստանին զենքի մատակարարումը և Խաղաղության եվրոպական հիմնադրամի կողմից Հայաստանին 10 մլն եվրո տրամադրելը՝ Ադրբեջանը հայտարարել էր, թե դրանք վկայում են Ադրբեջանի դեմ պատերազմի նախապատրաստման մասին։
Հայաստանի ԱԳՆ խոսնակը հայտնել է հետևյալը․
«Ադրբեջանի ՊՆ տարածած հերթական հայտարարությունը Հայաստանի Հանրապետության բանակի կողմից Հայաստան-Ադրբեջան պետական սահմանին սադրիչ գործողությունների մասին անհասկանալի են:
Հայաստանի Հանրապետության վարչապետի աշխատակազմի դիվանագիտական խողովակներով և հրապարակայնորեն արված առաջարկները սահմանային միջադեպերի և/կամ դրանց մասին տեղեկությունների հետաքննության՝ Հայաստան-Ադրբեջան համատեղ մեխանիզմ ստեղծելու մասին՝ շարունակում են անարձագանք մնալ Ադրբեջանի կողմից: Նման մեխանիզմի գործարկումը հնարավորություն կտար պարզաբանել ցանկացած իրավիճակ և կկանխարգելեր իրականությանը չհամապատասխանող տեղեկությունների տարածումը:
Միևնույն ժամանակ, Հայաստանի Հանրապետությանն էսկալացիոն հռետորաբանության մեջ ներքաշելու փորձերն անընդունելի են: ՀՀ կառավարությունը շարունակում է հավատարիմ մնալ խաղաղության օրակարգին և չի շեղվելու այս ռազմավարությունից:
Ինչ վերաբերվում է Հայաստանի Հանրապետության զինված ուժերի բարեփոխումներին, սպառազինության և տեխնիկայի ձեռքբերմանը, բազմիցս նշել ենք, որ մարտունակ բանակ ունենալը ցանկացած երկրի ինքնիշխան իրավունքն է, և Հայաստանի Հանրապետությունը պաշտպանության ու անվտանգության ոլորտում իր միջազգայնորեն ճանաչված տարածքի պաշտպանությունից դուրս որևէ այլ նպատակ չունի: Բանակի բարեփոխումների գործընթացում Հայաստանի Հանրապետությունը գործում է բացառապես միջազգային իրավունքի շրջանակներում:
Նաև հիշեցնում ենք, որ Հայաստանի Հանրապետությունը դիվանագիտական խողովակներով և հրապարակային Ադրբեջանին առաջարկել է սպառազինությունների վերահսկման փոխադարձ մեխանիզմ ստեղծել և համապատասխան պայմանագիր կնքել, ինչը նույնպես Ադրբեջանը թողել է անպատասխան: Չնայած սրան, նաև այս առաջարկն է շարունակում մնալ ուժի մեջ»:
Մեկնաբանել