Գյումրու «Երեխաների տանը» մահացած երեխան պետության խնամքին տեղափոխվել է անմիջապես ծննդատնից. ԱՍՀՆ
Գյումրու «Երեխաների տուն» ՊՈԱԿ-ում 2–ամյա երեխայի մահվան դեպքի առնչությամբ Աշխատանքի և սոցիալական հարցերի նախարարությունը տեղեկացնում է, որ երեխան պետության խնամքին տեղափոխվել է 2022 թվականի օգոստոսի 12-ին՝ անմիջապես ծննդատնից, 2 օրական, բնածին առողջական ծանր խնդիրներով (առողջական խնդիրները մանրամասնորեն չեն նշվում՝ հաշվի առնելով, որ տեղեկությունը պարունակում է բժշկական գաղտնիք և հրապարակման ենթակա չէ):
«Պետության խնամքի հաստատություններում ապրում են նաև առողջական ծանր խնդիրներով երեխաներ, և ցավոք, կան հիվանդություններ, որոնք կյանքի հետ հաճախ անհամատեղելի են։
2024 թվականի օգոստոսի 2-ին՝ մինչ երեխայի մահը, հաստատության հերթապահ բժշկի և բուժքրոջ կողմից կատարվել են վերակենդանացման միջոցառումներ, կանչվել է շտապ բուժօգնություն։ Վերակենդանացման միջոցառումները եղել են ապարդյուն, երեխայի մոտ գրանցվել է մահ։
Դեպքի մասին խնամքի հաստատությունն անմիջապես հաղորդել է ՀՀ ՆԳՆ ոստիկանության Գյումրիի Մուշի բաժնի հերթապահ մաս»,- ասված է հաղորդագրությունում։
Ավելի վաղ մամուլում հրապարակումներ էին հայտնվել, որ «Երեխաների տուն» պետական ոչ առևտրային կազմակերպությունում օգոստոսի 2-ին երեխա է մահացել։
Լուսանկարում՝ Գյումրու «Երեխաների տուն» ՊՈԱԿ-ի շենքը
Մեկնաբանել