ՄԱԿ-ը պետք է Իսրայելին հայտարարի ահաբեկչական պետություն, ինչը պայմանավորված է Գազայի հատվածի խաղաղ բնակչության շրջանում զանգվածային զոհերով: Նման դիրքորոշում է հայտնել Ժնևի ՄԱԿ-ի գրասենյակում և այլ միջազգային կազմակերպություններում Իրանի մշտական ներկայացուցիչ Ալի Բահրեյնին:

«Ահաբեկչության ֆինանսավորման դեմ պայքարի մասին միջազգային կոնվենցիայի 2.1-րդ հոդվածի համաձայն՝ իսրայելական վարչակարգի ինստիտուտները պետք է ճանաչվեն ահաբեկչական։ Հետևաբար, Պաղեստինի քաղաքացիական բնակչության դեմ իսրայելական վարչակարգի կողմից իրականացվող գործողությունները ահաբեկչության ակնհայտ դրսևորում են»,- ՄԱԿ-ի Մարդու իրավունքների գերագույն հանձնակատար Վոլկեր Տյուրկին և այս կազմակերպության երկու հատուկ զեկուցողներին գրել է Բահրեյնին։ 

Ըստ նրա՝ «վերացնելով Պաղեստինի առաջնորդներին՝ Իսրայելը ձգտում է ոչնչացնել պաղեստինյան քաղաքական ինքնությունը և Պաղեստինի ժողովրդից խլել անկախ պետության հիմնարար իրավունքը»։ Նա ՄԱԿ-ից պահանջել է դատապարտել Թեհրանում պաղեստինյան ՀԱՄԱՍ շարժման քաղբյուրոյի ղեկավար Իսմայիլ Հանիայի սպանությունը:

Մերձավոր Արևելքում իրավիճակի հերթական սրումը սկսվեց հուլիսի վերջին, երբ հայտնի դարձավ, որ իսրայելական գործողությունների հետևանքով զոհվել են Հեզբոլահի զինված կազմավորումների հրամանատար Ֆուադ Շուքերը, ՀԱՄԱՍ արմատական շարժման քաղբյուրոյի ղեկավար Իսմայիլ Հանիան և ՀԱՄԱՍ-ի ռազմական թևի ղեկավար Մուհամեդ Դեյֆը:

Իրանը մտադիր է Իսրայելի վրա հարձակվել մի շարք խմբավորումների, այդ թվում՝ Հեզբոլահի և Եմենի հութիների հետ։ Հեզբոլահի առաջնորդ Հասան Նասրուլան հայտնել է, որ Իսրայելին հարվածներ կհասցվեն Իրանից, Եմենից և Լիբանանից։ Նրա խոսքով՝ Հեզբոլահն ունի հրթիռային զենքեր, որոնք «մեկ ժամից էլ քիչ ժամանակահատվածում» կոչնչացնեն իսրայելական մի քանի ռազմական գործարաններ։

Լուսանկարը՝ IRNA գործակալությունից