Դատարանի միջանցքում ժամերով սպասելը վատ սովորություն է դարձել. մեղադրյալին ՆԳՆ ոստիկանության ուղեկցող գումարտակն ուշ է բերում, կամ ազատ դահլիճ չկա։ Միջանցքում մեկ ժամ սպասելուց հետո զոհվածների ծնողներին ու լրագրողներին նիստերի դահլիճ են հրավիրում։ Խուռհատի գործով վկան այսօր Ջրականի զորամասի սպա-հոգեբան Արայիկ Հայրյանն է։

Զորամասի հոգեբանը դատարանին հայտնեց, որ Ջրականի 5-րդ գումարտակի զինծառայողները 44-օրյա պատերազմի ժամանակ ծանր հոգեբանական վիճակում են եղել։

Հիշեցնենք՝ գումարտակի զինծառայողների մեծ մասը նորակոչիկներ էին՝ 2 ամսվա ծառայողներ։ Գումարտակի հրամանատար Իշխան Վահանյանն այժմ մեղադրվում է պատերազմի ընթացքում նորակոչիկներին միայնակ թողնելու և մարտական դիրքերը լքելու մեջ։ 

Չիմանալով հակառակորդի տեղակայման մասին՝ նորակոչիկների մի մասը Վանք գյուղ նահանջելով՝ զոհվել կամ գերեվարվել է։

Արայիկ Հայրյանի խոսքով՝ զինծառայողներն իրեն պատմել են, որ Խուռհատում հակառակորդը հարձակման է անցել, խառնաշփոթ իրավիճակ է ստեղծվել, կապ չի եղել։

«Զինծառայողները տվյալ պարագայում սթրեսային վիճակում էին, առաջինը վախն էր իրենց մոտ, տագնապայնությունը, ընկերների կորուստը»,- պատմեց հոգեբանը։

Ըստ նրա՝ զինծառայողները հայտնել են, որ իրենք զենքին չեն տիրապետել, հակառակորդը պատրաստված էր, իսկ սպաներն իրենց հետ չեն եղել։

Իշխան Վահանյանը և հանրային պաշտպան Սիրանուշ Հարությունյանը

Դատավոր Ջոն Հայրապետյանը հետաքրքրվեց՝ ինչ-որ մեկին մեղադրո՞ւմ էին այդ խառնաշփոթի համար, կամ որ իրենց ընկերները զոհվել են։

-Դեպք չեմ հիշում,- պատասխանեց հոգեբանը։

Դատավորը նշեց՝ մոտ 30 վկա հարցաքննվել և հայտնել է, որ վատ բարոյահոգեբանական վիճակում է եղել՝ պայմանավորված x հանգամանքի հետ։ Դատավորը հետաքրքրվեց, թե զինծառայողները հոգեբանին ինչ հիմնական պատճառ են հայտնել, որի հետևանքով գտնվել են վատ բարոյահոգեբանական վիճակում։

-Մնացել մենակ, տարբեր ուղղություններով են գնացել,- պատասխանեց հոգեբանը, ինչից հետո իրավիճակը նիստերի դահլիճում լարվեց։

-Նորմալ պատասխանի,- տեղից ասացին ծնողները։

Դատավորը հարցրեց՝ ինչ պատճառ են նշել զինծառայողները Խուռհատ սարի օպերացիան ձախողելու համար։

-Սպա չեն ունեցել իրենց հետ,- ասաց նա։

Դատավոր Ջոն Հայրապետյանը

-Ըստ գործի նյութերի՝ Իշխան Վահանյանը իրենց հետ բարձրացել է Խուռհատ սար, բա էլ ո՞նց սպա չեն ունեցել,- հարցրեց դատավորը։

-Դե որ վիրավորվել ա, գնացել ա։

-Զինվորները Ձեզ հայտնե՞լ են այդ հանգամանքի մասին։

-Պատմել են, որ վիրավորվել ա գնացել ա… Ես լսեմ եմ, որ չի էլ վիրավորվել։

Սպա-հոգեբանը թե՛ դատավորի, թե՛ տուժողների իրավահաջորդների ներկայացուցչի հարցերին հստակ չէր պատասխանում։

-Պատերազմի ժամանակ կոնտուզիա եմ ստացել,- այսպես մեկնաբանեց Հայրյանը։

Դատավորը հայտնեց, որ վկան պետք է փորձի վերհիշել և բոլոր հարցերին պատասխանել։

-Անհնար է թեկուզ կոնտուզիա ստացած սպան տենց էական բաները չհիշի,- ասաց Ջոն Հայրապետյանը։

Արայիկ Հայրյանը

Տուժողի իրավահաջորդ Արսեն Ղուկասյանն էլ դատարանում հայտարարեց, որ զորամասի հոգեբանի ներկայությամբ զրուցել է մի շարք զինծառայողների հետ, և որ Հայրյանը մի շարք զինծառայողների մարտական ուղիներ է պատրաստել, խոսել է նրանց հետ։

-Եթե դու մարտական ուղի ես սարքել, ո՞նց կարող է չիմանայիր՝ իրենց հետ ինչ եղավ։

Մարտական ուղիներում նշվել են զինծառայողի կատարած սխրանքները, թե ոնց են հակառակորդին դիմագրավել, բոլոր փաստաղթղերը տպվել և պահպանվում են,- ասաց նա։

Հայրյանի հարցաքննությունն ավարատվեց։ Դատավոր Ջոն Հայրապետյանը տեղեկացրեց, որ մեկ այլ վկա Արթուր Քարամյանը խուսափում է դատարան ներկայանալ։ Վերջինիս բերման ենթարկելու որոշում կայացրեց։ Հիշեցնենք՝ Քարամյանը 44-օրյա պատերազմի սկզբում Ջրականի զորամասի առաջնագծի մասով հրամանատարի տեղակալ է եղել, այնուհետև՝ զորամասի հրամանատար։ 

Հաջորդ դատական նիստը նշանակվեց սեպտեմբերի 26-ին՝ ժամը 16.00-ին։

Արթուր Քարամյանի նախորդ ցուցմունքը՝