Հանրապետական կուսակցությունից ԱՄՆ փոխնախագահի թեկնածու Ջեյ Դի Վենսը հայտարարել է, որ նոյեմբերին կայանալիք նախագահական ընտրությունների ժամանակ Դոնալդ Թրամփի հաղթանակի պարագայում Չինաստանին հակազդելը կլինի նրա արտաքին քաղաքականության առաջնահերթ ուղղությունը:

«Դոնալդ Թրամփը և ես մտադիր ենք կենտրոնանալ ամերիկյան արտադրության վերականգնման, Չինաստանից ԱՄՆ աշխատատեղերի վերադարձի վրա, որպեսզի թույլ չտանք ՉԺՀ-ին մեր հաշվին կառուցել իր միջին դասը։ Եթե մենք հաղթահարենք դա, ապա առաջիկա 50 տարիների ընթացքում կարող ենք հաջողությամբ դիմակայել Չինաստանին։ Պետք է կենտրոնանալ դրա վրա, սա ամենակարևոր արտաքին քաղաքական խնդիրն է»,- Fox News հեռուստաընկերությանը տված հարցազրույցում հայտարարել է Վենսը։

Ավելի վաղ Թրամփը հայտարարել էր, որ կցանկանար կարգավորել հարաբերությունները Չինաստանի հետ: ԱՄՆ նախկին նախագահի կարծիքով՝ դրա համար Վաշինգտոնին առաջին հերթին անհրաժեշտ է հասնել Պեկինի հարգանքին։

ԱՄՆ-ում նախագահական ընտրությունները կկայանան նոյեմբերի 5-ին: Սկզբում ակնկալվում էր, որ Դեմոկրատական կուսակցությունից մրցապայքարի մեջ կմտնի գործող նախագահ Ջո Բայդենը, սակայն Թրամփի հետ հունիսյան բանավեճում Բայդենի ձախողումից հետո դեմոկրատները սկսեցին նոր թեկնածուներ որոնել։  Հուլիսի 21-ին Բայդենը հայտարարեց նախագահական մրցավազքից իր դուրս գալու մասին և աջակցեց փոխնախագահ Քամալա Հարիսի թեկնածությանը: Հանրապետական կուսակցությունից նախագահի թեկնածու է առաջադրվել Դոնալդ Թրամփը։

Կոլաժը՝ CNN-ից