Հարկադրված ենք հերթական անգամ  պատասխանելու էլեկտրոնային կայքերում շրջանառության  մեջ  դրված ստահոդ  այն  տեղեկատվությանը, թե Գյումրու քաղաքապետի որդու կողմից  ինչ-որ  սպառնալիքներ են հնչել ինչ-որ անձանց հասցեին:

Վստահաբար  կարող ենք ասել, որ այսօրինակ բամբասանքի տարածման ետևում    կանգնած է   կոնկրետ  հանձնառություն ունեցող շահագրգիռ   մարդկանց  խումբ, որը  տարիներ շարունակ  իրականացրել և  իրականացնում է  տեղեկատվական  սադրանք` վարկաբեկելով Գյումրու քաղաքապետին և նրա ընտանիքի անդամներին:

Ենթադրելի է, որ այս գործողությունները 2007 թվականին Գյումրու  քաղաքապետի նկատմամբ իրականացրած մահափորձի և 2012 թվականի  ապրիլին քաղաքապետի դստեր  փեսացուի  սպանության կազմակերպման  շարունակությունն են:

Հետևելով կեղծ տեղեկատվությունը՝«հմտորեն» տարածող կայքերից գոնե երկուսին, պարզ է դառնում, որ գործընթացին միացել են «նորագիրներ», ովքեր փորձում են շահել իրենց տերերի վստահությունը՝ գործադրելով  գերբնական ճիգեր ու մշտապես հանդես գալով «մի խումբ գյումրեցիների» անունից:

Դրանք  իրենց  հայտնի «վասակյան» գործունեությունը  քողարկում են   հասարակական կազմակերպության անվան տակ, որպեսզի հայտնի  չդառնա, թե իրենք իրականում ում կերակրատաշտից են օգտվել ու  օգտվում:

Բոլոր բանական մարդկանց համար էլ պարզ է, որ սա շինծու  տեղակատվության բազմացման նենգ ու վախկոտ խմբակի ձեռագիր է:

Գյումրու քաղաքապետի որդին նման որևէ միջադեպի հետ  կապ  ու  առնչություն չունի, իսկ սփռված լուրը տեղեկատվական շարունակական  տեռորի  դրսևորում է: 

Գյումրու քաղաքապետարանի մամուլի քարտուղարություն