Թուրքիայի ֆինանսների նախարար Մեհմեթ Շիմշեքը հերքել է իր հրաժարականի մասին լուրերը և դրանք անվանել «սուտ ու շուկան շահարկելու փորձ»:

«Ըստ երևույթին, պաշտոնական հայտարարությունները բավարար չէին։ Եկեք ես էլ գրեմ: Ես հրաժարական չեմ տվել։ Սցենարները, որոնց մասին խոսվում է, չեն համապատասխանում իրականությանը։ Երկրի տնտեսության կառավարումը շարունակվում է թիմային ոգով։ Արդեն որոշ ժամանակ է, ինչ փորձ է արվում օրակարգը միտումնավոր լցնել կեղծ լուրերով։ Մենք չենք կարող թույլ տալ, որ հորինված պատմությունները ազդեն մեր տնտեսության և շուկաների վրա»,- X-ի իր միկրոբլոգում գրել է թուրք նախարարը։

Anlaşılan yapılan resmi açıklamalar yetmemiş, bir de buradan yazayım!

İstifa etmedim. Dolaşıma koyulan senaryolar doğru değildir.

- Ekonomi yönetimi bir ekip ruhuyla çalışıyor. Aldığımız büyük ve zor sorumluluğun farkındayız. Bu sorumluluğun bilinciyle her gün daha iyiye…

— Mehmet Simsek (@memetsimsek) August 23, 2024

Շիմշեքը նշել է, որ Թուրքիայի իշխանությունները «մեծ աշխատանք ունեն անելու երկրի խնդիրները լուծելու, դրա ներուժն ու արդյունավետությունը բարձրացնելու համար»: «Մենք վճռական ենք նվազեցնել գնաճը, նվազեցնել ընթացիկ հաշվի դեֆիցիտը, ապահովել բյուջետային կարգապահությունը և լուծել կառուցվածքային խնդիրները: Մենք պատրաստ ենք շարունակել մեր աշխատանքը: Երբ մեր ծրագրի նպատակներին հասնենք, մեր քաղաքացիների բարեկեցությունը կաճի»,- հավելել է նա։ 

Թուրքիայի ֆինանսների նախարարը հայտնել է, որ «հաշվի դեֆիցիտը կրճատվել է, իսկ կենտրոնական բանկի պահուստներն աճել են»։ «Սկսվել է գնաճի զգալի և մշտական նվազում»,- եզրափակել է Շիմշեքը։

Օգոստոսի 21-ին թուրքական Yenica թերթը գրել էր, որ Շիմշեքը, որը գլխավորում է կառավարության տնտեսական բլոկը, երկու շաբաթ առաջ հրաժարականի դիմում է ներկայացրել, սակայն Թուրքիայի փոխնախագահ Ջևդեթ Յըլմազը համոզել է նրան մնալ այդ պաշտոնում: Թուրքիայի նախագահի աշխատակազմի ապատեղեկատվության դեմ պայքարի կենտրոնը հերքել էր այս հրապարակումը՝ նշելով, որ «ապատեղեկատվական բնույթի նման հաղորդագրությունները տարածվում են միտումնավոր՝ շուկաներում անհանգստություն և անվստահություն առաջացնելու նպատակով»։

Թուրքական ընդդիմությունը բազմիցս քննադատել է Թուրքիայի ֆինանսների նախարարին՝ գնաճին հակազդելու հարցում անարդյունավետության համար։ Շիմշեքն ի պատասխան հայտարարում է, որ վարվող տնտեսական քաղաքականության առաջին արդյունքները տեսանելի կլինեն տարեվերջին, երբ գնաճը կիջնի մինչև 38%: Շիմշեքի խոսքով՝ 2025 թվականը Թուրքիայի համար գնանկման տարի կլինի։ Հուլիսին Թուրքիայում գնաճը տարեկան կտրվածքով կազմել էր 61,78%։ 

Լուսանկարը՝ Anadolu գործակալության