Ուկրաինական հետախուզության տվյալներով՝ Բելառուսը, զորավարժությունների անվան տակ, զգալի քանակությամբ անձնակազմ և ռազմական տեխնիկա է կենտրոնացրել Ուկրաինայի հետ սահմանի մոտ։ Այդ մասին հայտարարել է Ուկրաինայի արտաքին գործերի նախարարությունը։

Ուկրաինական արտաքին քաղաքական գերատեսչության հաղորդագրության համաձայն՝ խոսքն Ուկրաինայի հյուսիսային սահմանների մոտ, Բելառուսի Գոմելի մարզում, այդ երկրի ԶՈւ հատուկ գործողությունների ուժերի զինծառայողների, տանկերի, հրետանու, ՀԿՌՀ-ների և ՀՕՊ-ի ներգրավման մասին է: Ուկրաինայի ԱԳՆ-ից հավելել են, որ Բելառուսի տարածքում «նկատվել են նաև» Վագների վարձկանները։ 

Belarusian armed forces are concentrating a significant number of personnel, weapons, and equipment near Ukraine's northern border under the guise of exercises.

We warn Belarusian officials not to make tragic mistakes under Moscow’s pressure and withdraw forces from our border. pic.twitter.com/w7rmcIJQf3

— MFA of Ukraine 🇺🇦 (@MFA_Ukraine) August 25, 2024

Ուկրաինայի ԱԳՆ-ն Բելառուսի իշխանություններին կոչ է արել «Մոսկվայի ճնշման տակ ողբերգական սխալներ թույլ չտալ», իսկ ռազմական հրամանատարությանը՝ դադարեցնել «ոչ բարեկամական գործողությունները» և հետ քաշել բանակը ուկրաինական սահմաններից:

«Սահմանի խախտման դեպքում Ուկրաինան ինքնապաշտպանության միջոցներ կձեռնարկի, իսկ բելառուսական զորքերի բոլոր կուտակումները կդառնան Ուկրաինայի զինված ուժերի համար օրինական թիրախներ»,- ասված է Ուկրաինայի արտաքին քաղաքական գերատեսչության հաղորդագրության մեջ։

«Մենք ընդգծում ենք, որ Ուկրաինան երբեք ոչ բարեկամական գործողություններ չի արել և չի պատրաստվում անել բելառուս ժողովրդի դեմ»,- շարունակել է պաշտոնական Կիևը։

Հիշեցնենք, որ օգոստոսի 18-ին Բելառուսի նախագահ Ալեքսանդր Լուկաշենկոն հայտարարել էր, որ բելառուսական բանակի գրեթե մեկ երրորդը տեղակայվել է Ուկրաինայի հետ սահման: Նա նաև հայտնել էր Բրեստից Գրոդնո պաշտպանական գծերի կառուցման մասին։

Լուսանկարը՝ Natalia Kolesnikova/AFP via Getty Images