Տեսանյութեր
Լուսանկարներ
Քաղաքապետարանը կտրամադրի մոտ 1000 խոտհնձող սարքավորում
Մայրաքաղաքի կանաչ տարածքների ու սիզամարգերի խնամքը պատշաճ իրականացնելու նպատակով' քաղաքապետարանը շուրջ 1000 խոտհնձող ժամանակակից սարքավորում կտրամադրի դպրոցներին, մանկապարտեզներին և համատիրություններին: Այս մասին նշել է քաղաքապետ Կարեն Կարապտյանն այսօր անցկացված հերթական աշխատանքային խորհրդակցության ժամանակ:
Կարեն Կարապետյանը հանձնարարել է լուրջ ուշադրություն դարձնել նաև մայրաքաղաքը համակարգված, մասնագիտորեն հիմնավորված և Երևանին բնորոշ յուրօրինակ դիզայնով կանաչապատելու խնդրին:
Քաղաքապետը մասնավորապես կարևորել է կամուրջների, հուշարձանների, ճարտարապետական նշանակություն ունեցող շենքային համալիրների արտաքին գեղարվեստական լուսավորման, կանաչապատման, շենքերի բարեկարգման և լվացման, ինչպես նաև մայրաքաղաքի փողոցների ասֆալտապատման աշխատանքների իրականացումը:
Մայրաքաղաքում հասարակական տրանսպորտի աշխատանքները կանոնակարգելու և կանգառներում այլ տրանսպորտային միջոցների կայանումը բացառելու նպատակով' քաղաքապետի հանձնարարությամբ շուտով մայրաքաղաքի բանուկ խաչմերուկներում և կանգառներում ամբողջությամբ կավարտվի 60 տեսախցիկի տեղադրման գործընթացը:
Կարեն Կարապետյանը հանձնարարել է գործընթացն ավարտելուց հետո սկսել մոնիտորինգի աշխատանքերը և իրականացնել մշտական վերահսկողություն: Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը:
Մեկնաբանել