Հովհաննես Վարդանյան եւ Աշխեն Եղոյան, Գարիկ Տոնոյան եւ Աննա Վարդանյան ամուսնական զույգերի ավազակային հարձակումից տուժած Ռոզա Վարդազարյանին պատճառվել էր 27 հազար 500 դրամի նյութական վնաս: Տանտիրուհու կողմից հայտնաբերված ամբաստանյալներ Գարիկ Տոնոյանն ու Հովհաննես Վարդանյանն իրենց հետ տարել էին մարգարիտ քարերով 2 վզնոց, մեկ ոսկեջրած վզնոց խաչ, եղունգների հարդարման պարագաներ, մեկ հասարակ ուլունքներով վզնոց եւ մեկ մեդալ: Ամբաստանյալները տուժածի տնից հեռանալուց հետո 4 օր թաքնվել են Գարիկի վարձակալած բնակարանում: Հափշտակած ավարը հիմնականում զայրացրել էր Աշխենին, ով կշտամբելով  ամուսնուն` Հովհաննեսին, ասել էր` «Չէիր կարող ատրճանակով էնպես մխեիր Ռոզայի գլխին, որ հայտներ ունեցած ոսկեղենի ու գումարի տեղը»:

Դեպքից հետո տուժող, 84-ամյա Ռոզա Վարդազարյանը վախից հիվանդացել է եւ մոտ 7 օր հիվանդ պառկել: Ծեր կնոջ մտքով սկսզբում ամենեւին էլ չի անցել դիմել ոստիկանություն: Հետո զանգահարել է քրոջն ու տեղափոխվել նրա տուն, դեպքի մասին պատմել քրոջ տղային, նրա հետ էլ գնացել են ոստիկանություն: Դատարանում տուժողն ասաց, որ Գարիկին չի ճանաչում, իսկ Հովհաննեսին լավ գիտի, թոռան` Արկադիկի հետ բազմիցս եղել է իր տանը, իր ձեռքի հացն է կերել, ինքը երբ հնարավորություն է ունեցել ծխախոտի գումարով օգնել է նրան:

«Ես Հովհաննեսին քայլվածքից ճանաչեցի,- դատարանում հայտնեց Ռոզա Վարդազարյանը,- ինքը կռացած է քայլում, ոտքերն էլ ծուռ-ծուռ է դնում, էդպես եմ իմացել, որ ինձ թալանողներից մեկը Հովհաննեսն է»: Արդեն ոստիկանությունում տիկին Ռոզան ճանաչել է նաեւ Աննային` իրեն նամակ բերող եւ որպես Սիրուշ ներկայացած աղջկան:

Դատակոչված երեք վկաներից ամբաստանյալ Աշխեն Եղոյանի մայրն ու եղբայրը հրաժարվեցին ցուցմունք տալ դատարանում: Հրապարակվեցին նրանց նախաքննական ցուցմունքները: Երրորդ վկան` անչափահաս Աննա Վարդանյանի մայրը` Սահկանույշ Վարդանյանը, հայտնեց, որ փեսայի եւ աղջկա մտադրության մասին տեղյակ չի եղել: Դեպքի օրը Աննան ու Գարիկն այցելել են իրեն, հայտնել աղջկա հղի լինելու լուրը, այդ առթիվ Գարիկը մի քանի բաժակ օղի է խմել: Այնուհետեւ զանգահարել է Հովհաննեսն ու փեսային եւ աղջկան կանչել իրենց տուն: Թե իրականում ինչ է կատարվել փետրվարի 12-ին, վկան իմացել է, երբ Աննային տարել են ոստիկանություն:

Քանի որ ամբաստանյալների նախաքննական եւ դատարանում տված ցուցմունքների ակնահայտ տարբերություն կար, ապացույցների հետազոտման փուլում հրապարակվեցին Աշխեն Եղոյանի, Հովհաննես Վարդանյանի, Աննա Վարդանյանի եւ Գարիկ Տոնոյանի նախաքննությանը տված ցուցմունքները: Դատարանում Աշխենն ու Հովհաննեսը հայտարարել էին, թե Աննայի անչափահաս լինելու մասին իմացել են միայն «ռազբոյ»-ից հետո, այնինչ Աշխենն իր ձեռքով գրած ցուցմունքում նշել էր, որ ինքը 20 տարեկան է, ամուսինը 19 տարեկան, Աննան 16 եւ նրա ամուսին Գարիկը 23 տարեկան: Նույնատիպ ցուցմունք էր տվել նաեւ Հովհաննես Վարդանյանը:

Ի վերջո, ամուսինները դատարանում ընդունեցին, որ իմացել են Աննայի անչափահաս լինելու հանգամանքը: Հովհաննեսն ընդունեց նաեւ, որ գողության միտքն իրենն է եղել եւ այն իրականացնելու համար ներգրավել է նաեւ Գարիկին ու Աննային: Ամբաստանյալներից Գարիկ Տոնոյանն էլ ընդունեց, որ ատրճանակ-կրակայրիչը վերցրել է ոչ թե պատահական, որովհետեւ ծխելու համար այլ կրակայրիչ չի ունեցել, այլ կանխամտածված: Վերցրել է հատուկ ծեր կնոջը վախեցնելու նպատակով:

Դատարանում ամբաստանյալ Հովհաննես Վարդանյանը մի քանի անգամ ներողություն խնդրեց տուժողից՝ ասելով. «Ռոզա տատ, խնդրեմգը, ներե ընձի, թող Աստված հենց հըմի, ըստեղ պատիժս տա»: Ներողություն խնդրեց նաեւ Գարիկ Տոնոյանն՝ ասելով, թե. «Ինչ էրել ենք, չհասկնալով ենք էրել, մենք մեզի որոշեցինք ու էրինք»:

Դատական հաջորդ նիստը տեղի կունենան հուլիսի 31-ին: