Գյումրին երգ ունի, Գյումրին վերք ունի, Գյումրին ասելու մի նոր խոսք ունի: 

Վերջին մի շաբաթվա ընթացքում կարծես թե անտառահատումներ են Հանրապետական կուսակցության շարքերում: ՀՀԿ Շիրակի մարզային խորհրդի ղեկավարի պաշտոնում Վարդան Ղուկասյանին փոխարինեց Սայաթ Մինասյանը: Մի փոքր ֆուտբոլային հնչեց՝ ինչեւէ: Հին կաղնիներին տապալում են լավ եւ բարեխիղճ աշխատանքի համար (համենայն դեպս Գյումրու քաղաքապետի աշխատանքը Հանրապետական կուսակցության շարքերում լավ եւ բարեխիղճ աշխատանք էր բնորոշում  ՀՀ ԱԺ նախագահ, ՀՀԿ կուսակցության ղեկավար Հովիկ Աբրահամյանը Գյումրի այցելության ընթացքում), որոնց փոխարինում են նորերը: 

Լավ ու բարեխիղճ աշխատանքի համար մի բան էլ պաշտոնապես ՇՆՈՐՀԱԿԱԼՈԻԹՅՈՒՆ էին հայտնել կուսակցության անունից: Կարելի է ենթադրել, որ շնորհակալություն հայտնել էին վերջին տասնամյակի ընթացքում Գյումրին մինչեւ ուղն ու ծուծը  Հանրապետական կուսակցության անդամ դարձնելով: «Ես էլ եմ շնորհակալ» դժվար թե լիներ, քանի որ Օազիսում էլ շնորհակալություն ասելու բան չէր մնացել: Վա՞տ էր: գալիս-գնում էիք, ուտում խմում էիք, ո՛չ ժողովրդից էիք տեղյակ, ո՛չ խնդիրներից: Ամեն անգամ բավարարվում էինք.«Վարդան, դու կկարգավորես չէ՞» հարցով, որի դիմաց ստանում էիք սպառիչ պատասխան.«Հա, հբը ինչխ»: Հիմա սեւ կատու է անցել մեջներով, թե եսիմ ում էշին են չոշ ասել, դժվար է կանխատեսել, բայց որ  Հանրապետական կուսակցությունում Դուք-ից անցել են Դու-ի՝ դա փաստ է:  Բայց թե էլի ընտրություններ կգա, բլբուլի ձայնն էլի պետք կգա, 5000-ը 10000 դարձնելու կարիք կլինի, վերջում էլ կհավաքվեն, կմտածեն կատվի վզին ո՞վ պետք է զանգ կախի: Ճստոն, Մստոն, Ֆլան, Բեֆան արդեն ոտքի վրա են, ոչ մեկ ոչ կաղ է, ոչ էլ խնդիր ունի: Տուր թե կտաս:

Մի կերպ լրագրողների հարցերին պատասխանելուց հետո քաղաքապետը ցույց տվեց, որ ժամանակը կգա ու ամեն ինչ պարզ կլինի, քանի որ ինքը Վերին Երուսաղեմի համար է անում ամեն ինչ: Լրագրողներից մեկին էլ արանքամեջ հասցրեց «ՄՈՒՏԻԼՈՎՉԻԿ» անվանարկել՝ խուսափելով ԲՀԿ-ական Սամվել Բալասանյանի մասին պաշտոնական հայտարարություն անելուց: 

Օնլայն լրատվամիջոցներն էլ սկսել են «ժառիտ անել»: 3 օր լուր են տարածում, հետո էլ 3 օր հերքում են այդ լուրը: Նախ ասում էին, որ Չիկագոյում, վայ չէ՝ Գյումրիում, քաղաքապետի որդին կրակոցներ է արձակել, հետո էլ ասում են.«Ազնիվ խոսք, գնացել ոստիկանությունից ճշտել ենք, որ նման բան չկա, Գյումրիում ընդհանրապես կրակոց չի եղել»: Հետո էլ Ազգային անվտանգությունից էին ճշտել, որ Սպարտակ Ղուկասյանը «Մատյան գնդի» հետ գնացել է Մոսկվա թռնելու, բայց ոստիկանությունը տարել է բարոյական հաղթանակ՝ չճշտված տվյալների համաձայն անձնագրային խնդիրներ ունենալու պատճառով չեն թույլատրել օդանավ բարձրանալ: Լրատվամիջոցներն էլ շտապել են ձեթ ավելացնել.«Գյումրու քաղաքապետի որդուն արգելել են լքել երկիրը» վերնագրերով: Իսկ եթե անձնագրի հետ կապված խնդիրները կարգավորի՝ ի՞նչ եք ասելու:  

Հետո եկավ գող փիսո ու քաչալ շուն հիշելու ժամանակը: ՀՀԿ անդամ, ԱԺ պատգամավոր Աշոտ Աղաբաբյանը ոչ պատշաճ կերպով էր արտահայտվել Վարդան Ղուկասյանի վերջին տասնամյակի ընթացքում կատարած աշխատանքի վերաբերյալ, ինչին ի պատասխան քաղաքապետը հիշեց, որ Աշոտը բուֆետչիկ է եղել, Օազիսում հաց ու մաց է կերել, ընտրություններին էլ պարբերաբար ջան են ասել, ջան լսել, հիմա Աղաբաբյանը Վասակի պես է իրեն պահում: Մոռացել է, որ ժամանակին կատուն ճոնն էր, շունն էլ գլխին գդակ չուներ:

Արդյունքում վիճակախաղի տոմսը ձեռքում սպասում է Սամվել Բալասանյանը: ՀՀԿ-ն «Դաբռոն» Գյումրիում ԲՀԿ-ին է տալիս: Ժողովուրդն էլ ասում է.«ՀԼԸ STOP»: «Գյումրին ես եմ» Ֆեյսբուքյան էջի նախաձեռնողական խումբը որոշել է ստորագրահավաք կազմակերպել՝ ի նշան իրենց ընտրական իրավունքի պաշտպանության: Ասում են ի՞նչ Սամվել, ի՞նչ բան, թողեք ընտրենք ում ուզում ենք՝ այսինքն Վարդան Ղուկասյանին էլի: 

Անդրադառնալով ԶԼՄ-ների ռեյտինգային մարաթոնին՝ ասեմ, որ ինչ ասես, որ չարեցին համ ու հոտով նյութեր տեղադրելու համար: Կարդալուց հետո իջնում էի քաղաք՝ իմանալով, որ տեխնիկա ու զորք պետք է տեսնեմ, էն էլ էլի հին ու մաշված քաղաքն էր: ՁԵՐ տաժանակիր աշխատանքի արդյունքում ամբողջ հայությունը խուճապի մեջ էր.«Ո՞նց թե: Գյումրիում քաղաքացիական պատերա՞զմ է»: Հրաշք եք, հրաշք, միայն ավելացնեմ.

 Վաղը ենթադրում եմ, որ կխոսեն.«Քաղաքապետի որդին այս անգամ «Թիլվիզկու պոեզով գուզեր տեղ էրտար», «Նախագահը կատաղել է», «Վարդանի հացն ու ջուրը միանգամից Նաջարյանը կտրեց», «Ճտերն աշնանն են հաշվում, ընտրություններն աշնանն են», «Վարդանը Հանրապետական կուսակցությունում ձայն հավաքող է եղել» ու լիքը փիֆ-փիֆ բաներ: Նախագահը Բաղրամյանից դուրս գար, մի հատ պարզաբանում տար՝ թեկուզ եւ կեղծ, դրան էլ եմ համաձայն, միայն թե աղբահավաք մեքենա չդառնա օնլայն լրատվական դաշտը:

Արսեն Վարդանյան

http://gyumri-armenia.blogspot.com/