Այս օրերին Արմավիր քաղաքում քննարկվող առաջին հարցը քաղաքային զբոսայգու 800 քմ տարածքում կատարվող ծառահատումներն ու տեղում սկսվող շինարարությունն է, իսկ Արմավիրի մարզպետարանի բնապահպանության և գյուղատնտեսության վարչության պետ Արթուր Այվազյանը զարմանում է, որ նման խնդիր կա քաղաքում: «Էդ ո՞ր խնդիրն ա»,- զարմացած հարցնում է վարչության պետը:

Ի դեպ, Արմավիրի մարզպետարանը այդ զբոսայգուց ընդամենը մի քանի մետր հեռավորության վրա է, և զարմանալի է, որ Արթուր Այվազյանի աչքից վրիպել է ծառերի հաշվին փորված հսկայական փոսը:

Բնապահպանության և գյուղատնտեսության վարչության պետին զբոսայգին ծառահատելու և տեղում բանկ կառուցելու մասին տեղեկացնելուց հետո հետևյալ պատասխանը ստացանք. «Որ ասեմ մենք տեղյակ չենք, կհավատա՞ս: Լավ, այդ հարցով կզբաղվենք, տեսնենք` ինչ է կատարվում»:

Փոխարենը խնդրով հետաքրքրված էր նույն վարչության բնապահպանության բաժնի պետ Սանասար Բաղդասարյանը, ով նաև «Անաղարտ բնություն» ՀԿ-ի նախագահն է:

Բաժնի պետի խոսքերով` Արմավիրի քաղաքապետարանն արդեն մի քանի տարի է, ապօրինի գործողություններ է կատարում զբոսայգում, որ ծառերը չորանան: «Անցյալ տարի էլ ծառերի բույնն են փորել, որպեսզի ծառերը չորանան, որ հատեն: Այս ուղղությամբ պատրաստվում եմ դիմել մարզպետին: Ես գիտեի` այդտեղ եկեղեցի են կառուցելու, բայց հետո իմացա, որ բանկ են կառուցում»,- ավելացրեց Ս. Բաղդասարյանը:

Նա նաև ասաց, թե քաղաքապետարանից իրեն հայտնել են, որ շինարարությունը հաստատված է քաղաքի հատակագծով, դրա թույլտվությունն անցել է 7 նախարարություններով, և ծառահատումներն էլ օրինական են արվել:

Լուսանկարը` ecolur.org-ից