Ադրբեջանը և Հայաստանը կարևոր շանս են ստացել Հարավային Կովկասում երկարատև խաղաղության և կայունության ապահովման համար: Նման հայտարարությամբ, Anadolu գործակալության փոխանցմամբ, Նյու Յորքում ամերիկյան վերլուծական մի շարք կենտրոնների ներկայացուցիչների հետ հանդիպման ժամանակ հայտարարել է Թուրքիայի նախագահ Ռեջեփ Թայիփ Էրդողանը։

Նրա խոսքով՝ Թուրքիայի սկզբունքային դիրքորոշումն է «իր ներդրումն ունենալ տարաձայնությունների վերացման, խաղաղության և բարիդրացիական հարաբերությունների ամրապնդման գործում»: «Մենք անխախտ ենք համարում պետությունների ինքնիշխանության և տարածքային ամբողջականության, ինչպես նաև միջազգային իրավունքի նորմերի նկատմամբ հարգանքը։ Ժամանակակից աշխարհն առավել քան երբևէ կարիք ունի այդ սկզբունքների»,- հայտարարել է Թուրքիայի նախագահը։

Էրդողանը նշել է, որ այդ նպատակներին հասնելու համար անհրաժեշտ է ամրապնդել բազմաբևեռ աշխարհակարգը։ «Երկրորդ համաշխարհային պատերազմից հետո ձևավորված երկբևեռ աշխարհը, ինչպես և միաբևեռ աշխարհը, մնացել է պատմության մեջ»,- հավելել է Էրդողանը՝ կոչ անելով բարեփոխել ՄԱԿ-ի Անվտանգության խորհրդի կառուցվածքը:

Լուսանկարը՝ hurriyetdailynews.com-ից