Այսօր տեղի ունեցավ Արարատի մարզի Նոր Խարբերդ և Մխչյան գյուղերի  փոստային բաժանմունքների վերաբացման արարողությունը:

Նոր Խարբերդի 105 մ² և Մխչյանի 172մ² տարածքով փոստային բաժանմունքները համալրեցին  «Հայփոստի» արդիականացված փոստային բաժանմունքների շարքը:

Նորացված փոստային բաժանմունքների վերաբացմանը ներկա էին «Հայփոստ» ՓԲԸ-ի գործադիր տնօրենի պաշտոնակատար Հայկ Ավագյանը, Իտալիայի փոստի ծրագրի ղեկավար Ալբերտո Բուտարոնին, երկու գյուղերի գյուղապետերը, ինչպես նաև տեղի բնակիչները:

Յուրաքանչյուր արդիականացված բաժանմունք, ներառյալ` հետնամասը, ամբողջովին վերանորոգված է: Փոստային բաժանմունքներն ամբողջովին կահավորված և ձևավորված են` համաձայն «Հայփոստի» նոր կերպարի: Արդիականացված բաժանմունքներում ծառայությունները մատուցվում են ժամանակակից տեղեկատվական տեխնոլոգիաների, նորարարական ծրագրերի, գլխամասի հետ առցանց կապի միջոցով, ինչը հնարավորություն է տալիս ավելի արագ և արդյունավետ փոստային, ֆինանսական և կոմերցիոն ծառայություններ մատուցել բնակչությանը:

 Նորացված բաժանմունքներն ապահովված են անվտանգության համակարգերով: Արդիականացված փոստային բաժանմունքներում հաճախորդները կարող են ձեռք բերել թերթեր, ամսագրեր, գրքեր և այլ մանրածախ ապրանքներ: «Ծառայությունների անկյունում» հնարավոր է օգտվել համացանցից, տպել, կատարել պատճենահանում, ուղարկել ֆաքս և այլն:

Նորացված փոստային բաժանմունքների վերապատրաստված աշխատակիցները պատրաստ են հավուր պատշաճի աջակցել հաճախորդներին:

«Հայփոստ թրասթ մենեջմենթ»-ը մտադիր է զարգացնել ավանդական փոստային ծառայությունները, ինչպես նաև ներդնել ժամանակակից, բնակչության կողմից պահանջված կոմերցիոն և փոստային-ֆինանսական ծառայություններ, ինչպիսիք են կատալոգային վաճառքը, ավտոմեքենաների, ճամփորդական և այցելուների (visitor) ապահովագրություն, սուրհանդակային և այլ ծառայություններ:

«Հայփոստի» մատուցած ծառայությունները հավասարապես հասանելի են թե’ քաղաքաներում, թե’ հեռավոր գյուղական համայնքներում: Ժամանակակից ծառայությունների շարքի համալրմանը զուգահեռ` պարբերաբար աճում է նաև մատուցած ծառայությունների որակը:

«Հայփոստ թրասթ մենեջմենթ»

Հայփոստ ՓԲԸ