Ադրբեջանի նախագահ Իլհամ Ալիևը «իրականությունից հեռու է անվանել» Հայաստանի այն առաջարկը, որ անհրաժեշտ է կնքել արդեն իսկ համաձայնեցված կետերով խաղաղության պայմանագիր, իսկ չհամաձայնեցված կետերը թողնել հետագային։ Նման կարծիք Ալիևը հայտնել է Ադրբեջանում Բելգիայի նորանշանակ դեսպան Ժյուլյեն դե Ֆրեպոյի հետ հանդիպման ժամանակ։ 

Ալիևը պնդում է, որ խաղաղության պայմանագրի բոլոր կետերը հավասարապես կարևոր են և չեն կարող իրարից տարանջատվել։

«Նախագահ Իլհամ Ալիևը նշել է, որ խաղաղության պայմանագրի բոլոր կետերը համարժեք են, միմյանցից անբաժան: Այս տեսանկյունից Հայաստանի տարօրինակ առաջարկը «ստորագրել այն ամենը, ինչ համաձայնեցված է՝ չհամաձայնեցված հոդվածները թողնելով հետագային» հեռու է իրականությունից, և նրան հայտնի չեն նման մոտեցման նախադեպերը»,- Ալիևի խոսքերը մեջբերել է նրա մամուլի ծառայությունը։ 

Ավելի վաղ, ՀՀ վարչապետ Նիկոլ Փաշինյանը հայտարարել էր, որ ներկայիս պայմանավորվածությունները արդեն բավարար են Բաքվի հետ խաղաղության պայմանագիր կնքելու համար։ Նա նշել է, որ վիճելի կետերը կարելի է դիտարկել նաև ուշ։ Փաշինյանը հավելել էր, որ հայկական կողմը պատրաստ է արդեն հոկտեմբերին խաղաղության պայմանագիր կնքել Ադրբեջանի հետ։ 

Հոկտեմբերի սկզբին Ադրբեջանի ԱԳՆ-ն Հայաստանին կոչ էր արել ընտրություն կատարել «հարաբերությունների կարգավորման գործընթացի և բոլոր մակարդակներում առճակատման միջև»: Հայկական կողմն էլ իր հերթին նշել էր, որ Բաքուն է սրում իրավիճակը, իսկ Երևանը հավատարիմ է հարաբերությունների կարգավորման առաջարկին։

Ադրբեջանական կողմը պնդում է, թե հիմնական խոչընդոտը, որը խանգարում է հայ-ադրբեջանական հարաբերությունների կարգավորմանը, «ՀՀ Սահմանադրությունից Ադրբեջանի նկատմամբ տարածքային պահանջներից հրաժարվելն է»։ Բաքուն նման կերպ է մեկնաբանում ՀՀ Սահմանադրության նախաբանում Անկախության հռչակագրին հղումը։ Երևանը պնդում է, որ Ադրբեջանի նկատմամբ իր Սահմանադրության մեջ տարածքային որևէ պահանջ չկա։

Լուսանկարը՝ Ադրբեջանի նախագահի մամուլի ծառայության