Ներքին գործերի նախարարությունից գրավոր հարցում են խնդրում՝ պատասխանելու հարցին՝ արդյոք Գյումրու նախկին քաղաքապետ Սամվել Բալասանյանի նկատմամբ հետախուզում հայտարարվե՞լ է։ Գյումրի քաղաքի պատմության և մշակույթի հուշարձանների ցանկում ընդգրկված «Սև բերդ» ամրոցի հարակից մոտ 20 հա հողերի վաճառքի գործով համայնքի նախկին ղեկավար Սամվել Բալասանյանին ձերբակալելու որոշում է կայացվել։ 70-ամյա նախկին քաղաքապետն այժմ գտնվում է Ամերիկայի Միացյալ Նահանգներում, և իրավապահները դժվար կարողանան իրագործել ձերբակալման որոշումը, հետևաբար ենթադրվում է, որ պետք է հետախուզում հայտարարվի։

Սամվել Բալասանյանը մեղադրվում է պաշտոնեական դիրքի չարաշահման և խոշոր  չափերի փողերի լվացման համար։ Մեկ շաբաթ առաջ էլ՝ հոկտեմբերի 11-ի գիշերը, «Զվարթնոց» օդանավակայանում ձերբակալվեց Ս․ Բալասանյանի որդին՝ Խաչատուր Բալասանյանը։ Վերջինս այժմ տնային կալանքի մեջ է, նրա համար վճարվել է 70 մլն դրամ գրավ։

Քննչական կոմիտեից հայտնել են, որ Խաչատուր Բալասանյանը ձերբակալվել է իր և իր մերձավորներին վերաբերող կոռուպցիոն բնույթի քրեական վարույթի շրջանակներում։

Դրանից հետո ձերբակալվել էր նաև Սամվել Բալասանյանի քրոջ ամուսինը՝ Ռուբեն Սանոյանը, ով Ս․ Բալասանյանի պաշտոնավարման տարիներին եղել է Գյումրու փոխքաղաքապետը, ինչպես նաև՝ համայնքի ղեկավարի գործող տեղակալ Սուրեն Ջանոյանը։ Վերջինս նույնպես տնային կալանքի մեջ է։ Դատարանի որոշմամբ կիրառվել է 20 մլն դրամ գրավ, իսկ Ռ․ Սանոյանն ազատ է արձակվել։

Նշենք, որ Ս․ Բալասանյանը Գյումրի համայնքը ղեկավարել է 9 տարի և պաշտոնավարումը դադարեցրել 2021թ․-ին։ Թեև նա փաստացի համայնքի ղեկավարը չէ, սակայն համայնքային բարձր օղակներում նրա ազգականներն են՝ համայնքի ղեկավար Վարդգես Սամսոնյանը մորաքրոջ թոռն է, իսկ տեղակալներից մեկը՝ Լուսինե Սանոյանը, Բալասանյանի քրոջ դուստրն է և այլն։

Վիճահարույց հողամասը Գյումրի համայնքին փոխանցվել է սեփականության իրավունքով, որպես բնակավայրերի նշանակության հասարակական կառուցապատման հողամաս, սակայն  Ս․ Բալասանյանի ու ավագանու որոշումներով հողամասը նախ օտարվել է Բալասանյաններին մտերիմ անձին, իսկ հետո՝ Ս․ Բալասանյանի որդուն՝ Խաչատուր Բալասանյանին։

Քրեական վարույթ նախաձեռնվել է այն հիմնավորմամբ, որ ամրոցին հարակից հողամասն օտարման ենթակա չի եղել, սակայն տարբեր կեղծիքներով այն օտարվել է։

Բալասանյանների և իշխող քաղաքական ուժերի հարաբերությունները վատ չէին։ Սամվել Բալասանյանի որդին՝ Միսակ Բալասանյանը, Հանրապետության նախագահի 2023թ․ սեպտեմբերի 5-ի հրամանագրով նշանակվեց Իրաքի Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Բաղդադ)։ Սակայն, երբ քաղաքական ուժերի կոալիցիան պառակտվեց, նշանակումից մոտ 4 ամիս անց Միսակ Բալասանյանը հետ կանչվեց դեսպանի պաշտոնից։

Լարվածություն առաջացավ այն բանից հետո, երբ խզվեց «Բալասանյան» դաշինքի և «Քաղաքացիական պայմանագիր» կուսակցության կոալիցիան։ Մասնավորապես՝ 2021թ․ հոկտեմբերի 17-ին Գյումրի համայնքում տեղի ունեցած տեղական ինքնակառավարման մարմինների ընտրություններից հետո «Բալասանյան դաշինքը» և «Քաղաքացիական պայմանագիրը» համագործակցության հուշագիր ստորագրեցին։ Սակայն քաղաքական այս միությունը երկար «կյանք» չունեցավ։ 2023թ․ դեկտեմբերի 6-ին հայտարարվեց, որ «Քաղաքացիական պայմանագիրը» միակողմանիորեն խզում է համագործակցության հուշագիրը՝ պատճառաբանելով, որ համայնքում իրականացվում է ստվերային կառավարում։