Ազգային անվտանգության խորհրդի նախկին նախագահ Արթուր Բաղդասարյանն ու նրա ընտանիքի անդամները, հայրը հոկտեմբերի 29-ին հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն՝ Ա. Բաղդասարյանին պատկանող գույքի առնչությամբ իրականացված ուսումնասիրության նյութերին ծանոթանալու համար:

Արթուր Բաղդասարյանից բացի դատախազություն են հրավիրվել նաև կինը՝ Աննա Բաղդասարյանը, որդին և հայրը, որոնք ունեն նույն անուն ազգանունը՝ Վահան Բաղդասարյան:

Թե ինչ գույք է ցանկանում դատախազությունը բռնագանձել նախկին բարձրաստիճան պաշտոնյայից, դեռ հայտնի չէ: Այս փուլում դատախազությունն այդ ցանկը չի «գաղտնազերծում» պատճառաբանելով, որ շահագրգիռ անձինք նյութերին ծանոթանալու, բացատրություններ, ապացույցներ ներկայացնելու իրավունք ունեն, հետևաբար կարող է փոփոխություն լինել բռնագանձման ենթակա գույքի, դրամական միջոցների և այլ իրավունքների առումով:

Հիշեցնենք, որ Արթուր Բաղդասարյանը քաղաքական կարիերան սկսել է պատգամավորի աթոռից, որից հետո հիմնադրել ու ղեկավարել է «Օրինաց երկիր» կուսակցությունը: 2003թ. հունիսի 12-ից մինչեւ 2006թ. մայիսի 29-ը եղել է Ազգային ժողովի նախագահ, 2008թ. Հանրապետության նախագահի հրամանագրով նշանակվել է Ազգային անվտանգության խորհրդի քարտուղար՝ պաշտոնավարելով մինչև 2014թ. ապրիլի 30-ը: 

Գլխավոր լուսանկարը՝ Արթուր Բաղդասարյանի ֆեյսբուքյան էջից