Ուկրաինայի նախագահ Վլադիմիր Զելենսկին, բացի «պատերազմում հաղթանակի պլանից», հանձնարարել է պատերազմի ժամանակ Ուկրաինայի համար պատրաստել ներքին գործողությունների ծրագիր։ Այդ մասին գրում է BBC-ի ուկրաինական ծառայությունը։

Պարբերականի աղբյուրների տվյալներով՝ խոսքը մի փաստաթղթի մասին է, որը վերաբերելու է բազմաթիվ ոլորտներում ներքին որոշումներին, այդ թվում՝ ռազմարդյունաբերական համալիրի, պաշտպանության, տնտեսության, սոցիալական քաղաքականության և այլ ոլորտներին։

«Նպատակն է անել հնարավորը՝ միասնականությունը պահպանելու և երկրի զարգացման տարբեր ոլորտներում արդյունքների հասնելու համար»,- նշել է պարբերականի աղբյուրը։

Ուկրաինայի նախագահ Վլադիմիր Զելենսկին ավելի վաղ ներկայացրել էր «պատերազմում հաղթանակի պլանը», որտեղ խոսքը, մասնավորապես, վերաբերում էր ՆԱՏՕ-ին Ուկրաինայի անդամակցությանը, սպառազինության մատակարարմանը և դաշնակիցների փոխանցած հրթիռներով Ռուսաստանի տարածքում թիրախներին հարվածելու արգելքը հանելուն: Զելենսկին «հաղթանակի պլանը» նախ ներկայացրել էր Ուկրաինայի առանցքային դաշնակիցներին, իսկ հետո դրա մասին խոսել նաև Ուկրաինայի Գերագույն ռադայում։

Լուսանկարը՝ Ուկրաինայի նախագահի մամուլի ծառայության