Իսրայելի պաշտպանության բանակը հոկտեմբերի 26-ի գիշերն օդային մի շարք հարվածներ է հասցրել Իրանի ռազմական օբյեկտներին: ՑԱԽԱԼ-ի (Իսրայելի պաշտպանության բանակ՝ խմբ.) ղեկավարությունը հայտարարել է, որ ռմբակոծությունները Թեհրանի կողմից «շարունակական հարձակումների ամիսների» պատասխանն են:

«Իրանում գործող վարչակարգն ու տարածաշրջանում նրա վստահված անձինք 2023 թվականի հոկտեմբերի 7-ից անխոնջ հարձակվում են Իսրայելի վրա՝ յոթ ճակատով, ներառյալ Իրանի տարածքից ուղիղ հարձակումները։ Ինչպես աշխարհի ցանկացած այլ ինքնիշխան երկիր, Իսրայելն էլ ունի պատասխանելու իրավունք և պարտականություն»,- ասված է իսրայելական զինուժի հայտարարության մեջ։

In response to months of continuous attacks from the regime in Iran against the State of Israel—right now the Israel Defense Forces is conducting precise strikes on military targets in Iran.

The regime in Iran and its proxies in the region have been relentlessly attacking… pic.twitter.com/OcHUy7nQvN

— Israel Defense Forces (@IDF) October 25, 2024

Օդային հարվածները հասցվել են մի քանի ալիքներով՝ Երևանի ժամանակով 03:00-07:00-ն ընկած ժամանակահատվածում։ Օդ են բարձրացվել ավելի քան 100 կործանիչներ, այդ թվում՝ F-35։ Իրանական ԶԼՄ-ների տվյալներով, ի թիվս այլ թիրախների, հրթիռակոծության տակ են հայտնվել Թեհրանի շրջանում տեղակայված մի քանի ռազմաբազաներ, ինչպես նաև Իսլամական հեղափոխության պահապանների կորպուսի հրամանատարական կետը:

Առավոտյան Իսրայելի պաշտպանության բանակը հայտարարել է ռազմագործողության հաջողությամբ ավարտի մասին։ Հետախուզական ծառայությունների տվյալներով՝ Իսրայելի ռազմաօդային ուժերի ինքնաթիռները ճշգրիտ հարվածներ են հասցրել Իրանում հրթիռներ արտադրող ձեռնարկություններին, «երկիր-երկինք» դասի հրթիռային համալիրներին և «օդային օբյեկտներին, որոնք կոչված են սահմանափակելու իսրայելական ավիացիայի գործողությունների ազատությունը»:

Գործողությունը կրել է «Ապաշխարության օրեր» կոդային անվանումը։ Սա Իրանի տարածքում առաջին ռազմական գործողությունն է, որի համար Իսրայելի իշխանությունները պաշտոնապես ստանձնել են պատասխանատվությունը: ՑԱԽԱԼ-ի տվյալներով՝ իսրայելցի զինվորականների շրջանում տուժածներ չկան։ 

Իսրայելի կառավարության ներկայացուցիչը NBC News-ին հաստատել է, որ ՑԱԽԱԼ-ի հարձակումը սահմանափակվել է ռազմական թիրախներով և ուղղված չի եղել Իրանի նավթային կամ միջուկային օբյեկտներին, ինչի վախն ավելի վաղ ունեին ԱՄՆ նախագահի աշխատակազմում։ 

Սպիտակ տունը ՑԱԽԱԼ-ի հարվածները որակել է որպես «ինքնապաշտպանության նպատակով» գործողություն և պատասխան հոկտեմբերի 1-ին Իրանի կողմից Իսրայելի ուղղությամբ բալիստիկ հրթիռներով հարձակմանը:

Իրանի իշխանությունները հայտարարել են, որ ՀՕՊ ուժերը հաջողությամբ հետ են մղել Իսրայելի հարձակումները, սակայն որոշ շրջաններում «սահմանափակ վնաս» է հասցվել: Իրանցի զինվորականների խոսքով՝ իսրայելական ուժերը հարձակվել են Թեհրան, Խուզեստան և Իլամ նահանգներում գտնվող մի շարք օբյեկտների վրա: Իրանում զոհերի կամ տուժածների մասին տեղեկություններ չկան:

Լուսանկարը՝ middleeasteye.net-ից