Վրաստանում մեկնարկել են խորհրդարանական ընտրությունները։ Ինչպես պնդում են անկախ փորձագետներն ու լրատվամիջոցները, այս ընտրությունները կվճռեն Վրաստանի աշխարհաքաղաքական ապագան ու Արևմուտքի հետ վերջինիս հարաբերությունների ընթացքը։

Ընտրատեղամասերը բացվել են Երևանի ժամանակով 08:00-ին և կգործեն մինչև 20:00-ն։ Վրաստանի քաղաքացիները կկարողանան քվեարկել 3111 տեղամասերում, որոնցից 67-ը կբացվեն արտերկրում: Ընդհանուր առմամբ գրանցվել է մոտ 3,5 մլն ընտրող։ Ընտրություններին կարող են մասնակցել Վրաստանի սահմաններից դուրս բնակվող ռեկորդային թվով քաղաքացիներ՝ ավելի քան 95 հազար մարդ: Այս ընտրություններն առաջինն են էլեկտրոնային քվեատուփերի օգտագործման առումով, որոնք տեղադրված են տեղամասերի 74%-ում։

Ինչպես սպասվում է, քվեարկության առաջին արդյունքները ԿԸՀ-ն կսկսի հրապարակել տեղամասերի փակվելուց հետո երկու ժամվա ընթացքում: Քվեարկության ավարտից անմիջապես հետո տեղական հեռուստաալիքները ծրագրում են հայտնել էքզիթփոլների արդյունքները։ 

Ընտրությունների ժամանակ արդեն իսկ քվեարկել են նախագահ Սալոմե Զուրաբիշվիլին և վարչապետ Իրակլի Կոբախիձեն։ 

«Ես քվեարկել եմ նոր Վրաստանի օգտին, այն Վրաստանի, որի համար եկել եմ այստեղ 22 տարի առաջ, այն Վրաստանի համար, որի համար աղոթել են իմ նախնիները»,- լրագրողներին ասել է Վրաստանի նախագահը։ 

Վրաստանի վարչապետ Իրակլի Կոբախիձեն էլ ընդդիմությանը կոչ է արել ընդունել ընտրությունների արդյունքները։ «Ես ընդդիմությանը կոչ եմ անում հաշտվել և ճանաչել ընտրությունների արդյունքները, որոնք կհրապարակի Կենտրոնական ընտրական հանձնաժողովը»- նշել է Կոբախիձեն՝ հավելելով, որ իշխող կուսակցությունն ունի շուրջ 60% աջակցություն։

Արդեն 12 տարի իշխանության ղեկին գտնվող գործարար Բիձինա Իվանիշվիլիի «Վրացական երազանք» կուսակցությունն ընտրողներին կոչ է անում ընտրություն կատարել խաղաղության և պատերազմի միջև, որի մեջ, նրա կարծիքով, երկիրը ձգում է ընդդիմությունը:

Կուսակցությունը պատերազմի թեման օգտագործում էր իր գովազդային վահանակներում։ Պաստառների վրա մի կողմից պատկերված էին Ուկրաինայի քաղաքները, որոնք ավերվել էին ռուսական լայնածավալ ներխուժման ժամանակ և «ոչ պատերազմին» գրառումը։ Մյուս կողմում ցուցադրված էին Վրաստանի քաղաքների լուսանկարները՝ «ընտրիր խաղաղությունը» գրությամբ: Վրաստանի իշխանությունները հայտարարել էին, որ պատերազմի և խաղաղության համեմատությունն անհրաժեշտ է, «որպեսզի հասարակությունը ճիշտ ընտրություն կատարի»: Դատարանը տուգանել էր վրացական այն հեռուստաալիքներին, որոնք հրաժարվել էին հեռարձակել իշխող կուսակցության այս հոլովակը։

«Վրացական երազանք» կուսակցության առաջնորդ Բիձինա Իվանիշվիլին, որն առաջին անգամ է գլխավորում կուսակցության ընտրական ցուցակը, հայտարարել էր, որ Արևմուտքը փորձում է իշխանության բերել ընդդիմությանը, որպեսզի Վրաստանում «երկրորդ ճակատ» բացի Ռուսաստանի դեմ:

«Վրացական երազանքի» հիմնական մրցակիցներն են ընդդիմադիր չորս ուժերը։ «Միասնություն՝ ազգային շարժում» դաշինքի կազմում են «Միացյալ ազգային շարժում», «Աղմաշենեբելիի ռազմավարություն» և «Եվրոպական Վրաստան» կուսակցությունները: Ստեղծվել են նաև երկու առանձին դաշինքներ՝ «Կոալիցիա հանուն փոփոխությունների» և «Ուժեղ Վրաստան»: Դրանցից առանձին ընտրություններին նաև մասնակցում է նախկին վարչապետ Գեորգի Գախարիայի «Հանուն Վրաստանի» կուսակցությունը։ 

Ընդդիմադիր ուժերը հանդես են գալիս արևմտամետ դիրքերից և իշխանություններին մեղադրում են Ռուսաստանի շահերից ելնելով աշխատելու մեջ։  Ընդդիմությունը կոչ է անում ընտրողներին ընտրություն կատարել եվրոպական ինտեգրման և միջազգային մեկուսացման միջև, որը սպառնում է երկրին, եթե «Վրացական երազանքի» հաղթանակի դեպքում ուժեղանա Ռուսաստանի ազդեցությունը: Ընդ որում, «Վրացական երազանքն» իր պաստառներում օգտագործում է Եվրամիության խորհրդանիշներն ու կարգախոսները՝ «մենք երկիրը կբերենք Եվրամիություն» և «Դեպի Եվրոպա՝ արժանապատվորեն»: Միևնույն ժամանակ իշխող կուսակցությունն Արևմուտքին մեղադրում է ընտրություններին միջամտելու, իսկ ընդդիմությանը՝ ոչ սահմանադրական իշխանափոխության նախապատրաստվելու մեջ:

Լուսանկարը՝ Giorgi Arjevanidze/AFP via Getty Images