Թուրքիան ՄԱԿ-ին է փոխանցել մի նամակ, որտեղ ավելի քան 50 պետությունների կողմից Իսրայելի դեմ զենքի էմբարգո սահմանելու կոչ է արվում: Այդ մասին Anadolu գործակալության փոխանցմամբ հայտարարել է Թուրքիայի արտաքին գործերի նախարար Հաքան Ֆիդանը՝ Ջիբութիում «Թուրքիայի և Աֆրիկայի գործընկերություն» թեմայով համաժողովի ժամանակ։

«Նեթանյահուի կառավարությունը վերածվել է համաշխարհային սպառնալիքի աղբյուրի։ Ամեն հարմար առիթի դեպքում մենք պետք է կրկնենք, որ Իսրայելին զենք վաճառելը նշանակում է մեղսակցություն նրա կողմից իրագործվող ցեղասպանությանը։ Սա հասկանալով՝ մենք նոյեմբերի 1-ին ՄԱԿ-ին ենք փոխանցել 52 երկրների և միջազգային 2 կազմակերպությունների ստորագրություններով համատեղ նամակ, որտեղ Անվտանգության խորհրդին և բոլոր երկրներին կոչ է արվում  դադարեցնել Իսրայելին զենքի և զինամթերքի վաճառքը»,- նշել է Ֆիդանը։

Հոկտեմբերի 18-ին Թուրքիայի նախագահ Ռեջեփ Թայիփ Էրդողանը Հայաստանի, Ադրբեջանի, Ռուսաստանի և Իրանի արտաքին գործերի նախարարների հետ Ստամբուլում կայացած հանդիպման ժամանակ հայտարարել էր ՄԱԿ-ի կողմից Իսրայելի նկատմամբ զենքի էմբարգո սահմանելու անհրաժեշտության մասին։ Իսկ արդեն հոկտեմբերի 24-ին Կազանում Էրդողանը «ԲՐԻԿՍ պլյուսի» անդամներին կոչ էր արել աջակցել Անկարայի այդ նախաձեռնությանը։

Լուսանկարը՝ Associated Press գործակալության