![](/static/articles/01/70/64/l-pECpYe3hww.jpg)
Նվերներ՝ պոտենցիալ օլիմպիական չեմպիոններին
Այսօր ՀՀ-ում Միացյալ Թագավորության դեսպան Ջոնաթան Էյսը հյուրընկալվել էր «Էրեբունի» ԲԿ-ի ծննդատանը, որտեղ նվերներ հանձնեց 30-րդ լոնդոնյան ամառային խաղերի բացման ժամանակ ծնված երկու փոքրիկներին՝ Լուիզային եւ Հրաչյային:
Հրաչյան, որ ծնվել է գիշերվա ժամը 2-ին, հոր՝ Ալեքսանդրի ասելով, առաջինն է եղել: Ալեքսանդրի եւ կնոջ՝ Էլեոնորայի համար դեսպանի այցը մեծ հաշվով անակնկալ է եղել, քանի որ այդ մասին իմացել են նրա գալուց մի 5 րոպե առաջ: Դեսպանը մանկական հագուստ, խաղալիքներ ու «ոսկե» մեդալներ էր բերել փոքրիկներին:
Ըստ Էյսի՝ խաղերը ցույց են տալիս, թե ինչի կարող է հասնել մարդ կյանքում, եւ այս առումով ամեն մի նորածին իրենից հսկայական պոտենցիալ ուժ է ներկայացնում: Եվ գուցե այս երեխաներն էլ ապագայում դառնան օլիմպիական չեմպիոններ:
Օլիմպիական խաղերը եղել են ու մնում են խաղաղության խորհրդանիշ: Դրանց ժամանակ դադարեցվել են պատերազմները, հակամարտությունները, սակայն այս օրերին շարունակվում են բախումները աշխարհի տարբեր կետերում: Ի՞նչն է փոխվել, ինչու՞ է այսպես: «Հետքի» այս հարցին բրիտանացի գործիչը պատասխանում է, որ իրոք դա ցավալի երեւույթ է, սակայն խաղերի ժամանակ կարելի է նաեւ ականատես լինել նրան, որ հակամարտող երկրների ներկայացուցիչները հանդիպում են իրար, ուժերը չափում, ինչը դրական երեւույթ եւ բխում է խաղերի ոգուց, առաքելությունից:
Հուլիս 30-ին արդեն Կապանում դեսպան Էյվսը կիկին նվերներ կհանձնի օլիմպիադայի բացման օրը լույս աշխարհ եկած նորածիններին:
Մեկնաբանել