Կառավարությունը սակագնային քվոտա է սահմանում մի շարք գյուղատնտեսական ապրանքների համար։

Ի՞նչ է սակագնային քվոտան։ Այն գործիք է, որով պետությունը սահմանում է որոշ տեսակի ապրանքների ներմուծման կամ արտահանման չափը ԵԱՏՄ-ից դուրս երրորդ երկրից։

Այս տարի որոշ ապրանքների համար սահմանվել են հետևյալ առավելագույն չափաքանակները։

Խոշոր եղջերավոր անասունների միս՝ թարմ, պաղեցրած կամ սառեցրած՝ 9․5 հազար տոննա, խոզի միս` թարմ, պաղեցրած կամ սառեցրած՝ 9․4 հազար, ընտանի թռչունների միս և սննդային ենթամթերք՝ 35,1 հազար, կաթնային շիճուկ և ձևափոխված կաթնային շիճուկ՝ 700 տոննա։

Անցած տարվա համեմատ շուրջ 500 տոննայով ավելացել է խոշոր եղջերավոր անասունների մսի համար նախատեսված քվոտան, խոզի մսինը նվազել է 2,5 հազար տոննայով, թռչնամիսը՝ 4000 տոննայով։

Սակագնային քվոտան սահմանվում է այն ապրանքների վրա, որոնք արտադրվում են ԵԱՏՄ տարածքում։ Սա արվում է տեղի արտադրողներին պաշտպանելու նպատակով։ Քվոտան սահմանվում է, հաշվի առնելով, թե ինչքան է կազմում արտադրությունը և սպառումը։ Այսինքն՝ թե ինչքանով է տվյալ ապրանքի հարցում երկիրը կամ կառույցը ինքնաբավ։

Խոզի և տավարի մսի ինքնաբավությունը մեր երկրում 2022-ի և 2023-ի համեմատությամբ աճել է ընդամենը մի տոկոսով։ Թռչնամսինը նույնն է մնացել։

• Թռչնամսի ինքնաբավության աստիճանը Հայաստանում 30%-ի չի հասնում. որտեղից է այն ներմուծվում

Բայց տավարի մսի դեպքում 90,7% ինքնաբավության հասել ենք նաև սպառման նվազման հետևանքով։ Արտադրությունը մոտ 3 հազար տոննայով է նվազել, սպառումը՝ մոտ չորս։

Հավի մսի դեպքում թե՛ արտադրությունը, թե՛ սպառումը նվազել են չնչին տոկոսներով, խոզի մսի դեպում նույն սկզբունքով՝ աճել։

Լուսանկարը՝ Սարո Բաղդասարյանի