Եվրամիության արտաքին հարաբերությունների և անվտանգության քաղաքականության հարցերով բարձր ներկայացուցիչ Ժոզեպ Բորելը աշխատանքային այցով ժամանել է Կիև: Քաղաքական գործիչը մտադիր է Ուկրաինայի իշխանությունների հետ քննարկել Կիևին օգնություն տրամադրելու հարցը։ 

X-ի իր միկրոբլոգում Բորելը գրել է, որ ԵՄ արտաքին քաղաքական ծառայության ղեկավարի պաշտոնում սա իր հինգերորդ և վերջին այցն է Ուկրաինա։ 

In Kyiv for my 5th visit since Russia’s full-scale invasion and last one as HRVP.

EU support to #Ukraine has been my personal priority during my mandate and will remain on top of the EU‘s agenda. pic.twitter.com/XO5LvWopZY

— Josep Borrell Fontelles (@JosepBorrellF) November 9, 2024

Նա ընդգծել է, որ Ուկրաինայի աջակցությունը կմնա միավորման օրակարգի գլխավոր թեման:

Ժոզեպ Բորելը ԵՄ արտաքին հարաբերությունների գերագույն ներկայացուցչի պաշտոնը զբաղեցնում է 2019 թվականի դեկտեմբերի 1-ից, 2024 թվականի նոյեմբերի 30-ին կլրանա նրա լիազորությունների ժամկետը։ Այդ պաշտոնը դեկտեմբերի 1-ից կանցնի Էստոնիայի նախկին վարչապետ Կայա Կալասին:

Իր այցը Կիև Ժոզեպ Բորելը հայտարարել էր նոյեմբերի 7-8-ը Բուդապեշտում կայացած Եվրամիության գագաթնաժողովի ժամանակ։  Դրա ընթացքում ԵՄ երկրների ղեկավարները հայտարարել էին Ուկրաինային աջակցելու անհրաժեշտության մասին։ Իսկ հիմնական թեման դարձել էր Եվրոպայի և ԱՄՆ-ի հարաբերությունների ապագան Դոնալդ Թրամփի երդմնակալությունից հետո։

Լուսանկարը՝ AP Photo/Efrem Lukatsky