Արմավիրի մարզի Մեծամոր համայնքի Նոր Կեսարիա գյուղի մշակույթի տան շենքի գազիֆիկացման համակարգի կառուցման աշխատանքների մրցույթում հաղթող է ճանաչվել «Կապիտալ Գրուպ» ՍՊԸ-ի հայաստանյան մասնաճյուղը, որի հետ 2024թ. սեպտեմբերին կնքվել է պետական գնման պայմանագիր: Սակայն պայմանագիրը կնքելուց մոտ մեկ ամիս անց՝ հոկտեմբերի 22-ին, ընկերությունից Մեծամորի համայնքապետարան գրություն է ուղարկվել, որ ընկերությունն ի վիճակի չէ իրականացնել պայմանագրով սահմանված պարտավորությունները՝ ֆինանսական խնդիրների պատճառով: Համայնքի ղեկավարին խնդրել են լուծել պայմանագիրը:

Հոկտեմբերի 31-ին պայմանագիրը միակողմանի լուծվել է: Այդ մասին ծանուցվել է «Կապիտալ գրուպ» ՍՊԸ-ի հայաստանյան մասնաճյուղին՝ առաջարկելով տուժանքների մասին համաձայնագրերի համաձայն կատարել վճարումներ՝ մոտ 300 հազ. դրամի չափով: ՍՊԸ-ի հայաստանյան մասնաճյուղին սպասարկող «Արդշինբանկ» ՓԲԸ-ն Մեծամորի համայնքապետարանին տեղեկացրել է, որ ՍՊԸ-ի մասնաճյուղի բանկում սպասարկվող հաշվին առկա միջոցները բավարար չեն ապահովելու ներկայացված վճարման պահանջագրերի կատարումը:

Նշենք, որ պայմանագրի գինը խոշոր գումար չի եղել, կազմել է 840 հազ. դրամ:

Մեծամոր համայնքի ղեկավար Վահրամ Խաչատրյանը նոյեմբերի 25-ին որոշել է «Կապիտալ գրուպ» ՍՊԸ-ի հայաստանյան մասնաճյուղի տվյալները համապատասխան հիմքերով ուղարկել Ֆինանսների նախարարությանը՝ գնումների գործընթացին մասնակցելու իրավունք չունեցող մասնակիցների ցուցակում ներառելու նպատակով:

«Կապիտալ գրուպ» ՍՊԸ-ի հայաստանյան մասնաճյուղը 2024թ. օգոստոս-սեպտեմբեր ամիսներին Երևանի քաղաքապետարանի, Թալինի համայնքապետարանի, «Գավառի բժշկական կենտրոն» ՓԲԸ-ի հետ պայմանագրեր է կնքել՝ ընդհանուր մոտ 33 մլն դրամ ընդհանուր գնով:

«Կապիտալ գրուպ» ՍՊԸ-ն վրացական ընկերություն է: Հայաստանյան մասնաճյուղը, որն առանձին իրավաբանական անձ չէ, հիմնադրվել է վրացական ընկերության կողմից: Իսկ Հայաստանում գրանցվել է 2020թ. հունվարին: