Թուրքիայի նախագահ Ռեջեփ Թայիփ Էրդողանը Ռուսաստանի նախագահ Վլադիմիր Պուտինի հետ հեռախոսազրույցի ընթացքում քննարկել է Սիրիայում առկա իրավիճակը: Ինչպես հայտնել է Թուրքիայի նախագահի աշխատակազմի հաղորդակցությունների հարցերով վարչությունը, Էրդողանը հայտարարել է, որ Անկարան, աջակցելով Սիրիայի տարածքային ամբողջականությանը, ձգտում է այդ երկրում «արդար և երկարաժամկետ կարգավորման»:

Նա Դամասկոսի իշխանություններին կոչ է արել մասնակցել հակամարտության քաղաքական կարգավորմանը՝ ընդգծելով, որ կարևոր է թույլ չտալ, որ վնաս հասցվի քաղաքացիական բնակչությանը: Թուրքիայի նախագահը հավաստիացրել է, որ իր երկիրը «անում է հնարավորը Սիրիայում անդորրը վերականգնելու համար»:

Կրեմլի մամուլի ծառայությունից էլ հայտնել են, որ թուրքական կողմի նախաձեռնությամբ կայացած հեռախոսազրույցի ժամանակ, խոսվել է «Սիրիայում իրավիճակի կարգավորման գործում Ռուսաստանի, Թուրքիայի և Իրանի հետագա սերտ համակարգման առանցքային նշանակության մասին»։ 

Պուտինը հայտարարել է տարածաշրջանում Անկարայի ունեցած հնարավորություններն օգտագործելու անհրաժեշտության մասին՝ «երկրի ողջ տարածքում կայունության և սահմանադրական կարգի վերականգնման ուղղությամբ» սիրիական իշխանությունների ջանքերին աջակցելու համար:

Սիրիային սահմանակից Թուրքիան աջակցում է այդ երկրի քաղաքական և զինված ընդդիմությանը, որը դիմակայում է Սիրիայի նախագահ Բաշար Ասադին։ Սիրիայում կառավարական զորքերի դեմ ռազմական գործողություններին մասնակցող գլխավոր ուժերն են սուննի ծայրահեղական «Հայաթ Թահրիր աշ-Շամ» խմբավորման թուրքամետ իսլամիստները և Թուրքիայի աջակցությունը վայելող Սիրիայի ազգային բանակի ջոկատները:

Միևնույն ժամանակ, Սիրիայի իշխանությունների առանցքային դաշնակիցներն են Ռուսաստանն ու Իրանը:

Կոլաժը՝ РИА Новости-ի