
Կրկեսից՝ վանդակ, այնուհետև՝ փրկություն․ Հայաստանում ևս մեկ արջ ազատվեց գերությունից
Վայրի բնության և մշակութային արժեքների պահպանման հիմնադրամը (FPWC) հաղորդում է, որ Կենդանիների փրկության միջազգային կազմակերպության (IAR) հետ համագործակցությամբ գերությունից ազատվել է Մարգարիտա անունով արջը, որը տարիներ շարունակ պահվել է Բազմաղբյուր ձորի հանգստյան գոտիներից մեկում՝ անմխիթար պայմաններում:
«Մարգարիտան, որը նախկինում հանդես է եկել կրկեսում, վերջին չորս տարիներն անցկացրել է Բազմաղբյուրի հանգստյան գոտու փոքր վանդակում՝ ենթարկվելով ֆիզիկական և հոգեբանական տառապանքների։ Փրկարար գործողության շնորհիվ արջը տեղափոխվել է Ուրցաձորում գտնվող Վայրի կենդանիների փրկարար կենտրոն (WRC), որտեղ ստանում է մասնագիտական խնամք և վերականգնողական թերապիա:
«Մարգարիտայի պատմությունը ցույց է տալիս, թե ինչպես կարելի է փոխել գերության մեջ գտնվող վայրի կենդանիների ճակատագիրը։ Մեր նպատակն է ապահովել նրա լիարժեք վերականգնումը և բարեկեցությունը»,- նշում է FPWC-ի տնօրեն Ռուբեն Խաչատրյանը։
Ներկայումս Մարգարիտան ստանում է՝
- Հատուկ մշակված սննդակարգ
- Մասնագիտական կենդանաբուժական խնամք
- Վարքաբանական վերականգնողական աջակցություն
FPWC-ն կոչ է անում հասարակությանը միանալ այս նախաձեռնությանը: Նվիրատվություններ կատարելու համար այցելեք կազմակերպության պաշտոնական կայք:
Վայրի բնության և մշակութային արժեքների պահպանման հիմնադրամը (FPWC) առաջատար բնապահպանական կազմակերպություն է Հայաստանում։ Հիմնադրամի կողմից ստեղծված Վայրի կենդանիների փրկարար կենտրոնը (WRC) եզակի հաստատություն է, որն ապահովում է վտանգված և փրկված կենդանիների պահպանությունն ու խնամքը։ Կենտրոնի հիմնման օրվանից մի քանի տասնյակ արջեր փրկվել և ապաստան են գտել այստեղ՝ ազատվելով ռեստորանների, բենզալցակայանների, ավտոկայանների և այլ մասնավոր անբարենպաստ պայմաններից։ Կենտրոնում կենդանիներն ստանում են մասնագիտական խնամք, հատուկ մշակված սննդակարգ և անհրաժեշտ կենդանաբուժական օգնություն՝ ներառյալ ձմեռման նախապատրաստական աշխատանքները։
Կենդանիների փրկության միջազգային կազմակերպությունը (IAR) համաշխարհային ճանաչում ունեցող կառույց է, որը մասնագիտացած է վայրի կենդանիների փրկության և վերականգնման ոլորտում։ Հայաստանում IAR-ը հանդիսանում է FPWC-ի ռազմավարական գործընկերը՝ համատեղ իրականացնելով Արջերի փրկության ծրագիրը»,- նշվում է հաղորդագրությունում։
Մեկնաբանել