
Դոնալդ Թրամփը պաշտոնապես ստանձնեց ԱՄՆ-ի 47-րդ նախագահի պաշտոնը
ԱՄՆ մայրաքաղաք Վաշինգտոնում տեղի ունեցավ Դոնալդ Թրամփի երդմնակալության արարողությունը։
Ցուրտ եղանակի պատճառով արարողությունը անցկացվել է Կապիտոլիումի Ռոտոնդա դահլիճում։ Երդմնակալության արարողությանը ներկա են գտնվել ԱՄՆ բարձրաստիճան պաշտոնյաներ, տասնյակ երկրների ղեկավարներ, միջազգային կառույցների ներկայացուցիչներ և տեխնոլոգիական ոլորտի ընկերությունների ղեկավարներ։
Երդում է տվել և փոխնախագահի պաշտոնն է ստանձնել նաև 40-ամյա Ջեյմս Դեյվիդ Վենսը։
78-ամյա Թրամփը դարձավ ԱՄՆ-ի պատմության մեջ ամենածեր նախագահը, գերազանցելով նույնիսկ նախկին նախագահ Ջո Բայդենին, որը 4 տարի առաջ երդմնակալության ժամանակ Թրամփից 5 ամսով երիտասարդ էր։
Ավելի վաղ Թրամփը հայտնել էր, որ պաշտոնը ստանձնելուն պես նա պատրաստվում է ստորագրել մի շարք գործադիր հրամաններ: Օրինակ, մոտակա ժամանակներում հնարավոր է սահմանվեն նոր մաքսատուրքեր, Թրամփի հրամաններից մեկով դաշնային կառավարությունը կճանաչի միայն երկու գենդեր։ Նախատեսվում է նաև հրամանների շարք, որոնք ուղղված են միգրացիայի դեմ, ներառյալ՝ ապաստանի տրամադրման դադարեցումը, զորքերի տեղակայումը ԱՄՆ հարավային սահմաններում և ծննդավայրի հիմքով քաղաքացիության իրավունքի չեղարկումը։
Թրամփը պատրաստվում է նաև ներում շնորհել 2021 թվականի հունվարի 6-ին ԱՄՆ Կոնգրեսի շենք ներխուժած իր կողմնակիցներին։
Չնայած իր դեմ ուղղված երկու իմպիչմենթներին, պաշտոնական մեղադրանքներին և 34 քրեական հանցագործության համար դատավճռին, անցած տարվա նոյեմբերին Թրամփը ջախջախիչ հաղթանակ տարավ Քամալա Հարիսի նկատմամբ։
Մեկնաբանել