Մայիսի 31-ին Հայաստանի երիտասարդական հիմնադրամում Հայաստանի երիտասարդական հիմնադրամը և «Հայաստանն առանց ծխախոտի» հասարակական դաշինքը կազմակերպել էին մամուլի ասուլիս` նվիրված Ծխախոտի դեմ պայքարի համաշխարհային օրվան: Մայիսի 31-ը Ծխախոտի դեմ պայքարի համաշխարհային օրն է։

Հայաստանի Հանրապետությունը 2004թ. միացել է Առողջապահության համաշխարհային կազմակերպության Ծխախոտի դեմ պայքարի շրջանակային կոնվենցիային, որից հետո ընդունվել է «Ծխախոտի իրացման, սպառման և օգտագործման սահմանափակումների մասին» ՀՀ օրենքը, որով արգելվում է ծխելը հանրային տրանսպորտում, առողջապահական, կրթական, մշակութային վայրերում։ Սակայն ինչպես նշեց «Հայաստանն առանց ծխախոտի» հասարակական դաշինքի համակարգող Դիանա Պետրոսյանը, իրենց կողմից վերջին ամիսներին անցկացված մոնիտորինգը ցույց է տվել, որ օրենքն այնքան էլ արդյունավետ չի գործադրվում։

Հիմնական պատճառը խնդրի վերաբերյալ հանրության վատ իրազեկվածությունն է և ոչ պահանջատեր լինելը։ «Միայն օրենքներով և սահմանափակումներով խնդիրը լուծել հնարավոր չէ։ Մենք շատ լավ պատկերացնում ենք, որ օրենքին հետևողը մեր բնակչությունն է։ Եթե օրենսդրական փոփոխություններին զուգահեռ հնարավոր չլինի որոշակի փոփոխություններ կատարել մարդկանց մտածելակերպում և վարքագծում, ոչ մի օրենք չի կարող խնդիրը լիարժեք լուծել ծխախոտի դեմ պայքարում։ Ցանկացած լուծում պետք է ունենա նաև հասարակական ըմբռնում և աջակցություն»,- նշեց Հայաստանի երիտասարդական հիմնադրամի գործադիր տնօրեն Ալեքսանդր Տեր-Հովակիմյանը։

Ինչպես տեղեկացրեց ՀՀ առողջապահության նախարարության ծխելու դեմ պայքարի ծրագրի համակարգող Ալեքսանդր Բազարչյանը, Հայաստանում ծխում է 16-ից բարձր տարիքի տղամարդկանց 52 տոկոսը։ Կանանց շրջանում իրավիճակը բևեռացված է. Երևանում ծխող կանանց թիվը շատ ավելին է, քան մարզերում։ Վերջին ուսումնասիրություններից, որ կատարվել են 2010թ.-ին բժշկական կրթօջախների 3-րդ կուրսի ուսանողների շրջանում, պարզվել է, որ ծխում է աղջիկների 8-10 տոկոսը։

Ա. Բազարչյանը տեղեկացրեց նաև, որ ՀՀ առողջապահության նախարարությունը հանդես է եկել օրենսդրական նախաձեռնությամբ, որով փորձ է կատարվում արգելել ծխախոտի գովազդն ամբողջությամբ։ «Իհարկե, մենք կուզենայինք, որ շատ շուտ ստեղծվեին ծխախոտից զուրկ հասարակական գոտիներ, ծխախոտից զուրկ Հայաստան, սակայն դա միայն օրենսդրական հարց չէ։ Դա նաև հասարակական կազմակերպությունների և հասարակության խնդիրն է։ ՀՀ առաղջապահության նախարարությունը մշտապես շեշտել է, որ իրազեկման և մի շարք այլ գործառույթներում հասարակական կազմակերպություններն ու զանգվածային լրատվամիջոցներն իր հիմնական գործընկերներն են»,- նշեց Ա. Բազարչյանը։

«Հայաստանն առանց ծխախոտի» հասարակական դաշինքի համակարգող Դիանա Պետրոսյանը նույնպես շեշտեց բնակչության իրազեկման հարցը։ «Շատ կարևորում ենք քաղաքացիական հասարակության ակտիվությունը և փորձում ենք աշխատել բնակչության հետ, որպեսզի բարձրացնենք նրանց իրազեկության աստիճանն իրենց իրավունքների մասին։ Ի վերջո, օրենքներն ընդունվում են իրենց համար, և հենց հասարակությունն է, որ պետք է պարտադրի օրենքների կիրառումը»,- նշեց Դ. Պետրոսյանը։ Հայաստանի երիտասարդական հիմնադրամի հասարակայնության հետ կապերի ծառայություն