Տեսանյութեր
Լուսանկարներ
Բանգկոկում օդի աղտոտվածության պատճառով ավելի քան 350 դպրոց փակվել է
Թաիլանդի մայրաքաղաք Բանգկոկում օդի աղտոտվածության պատճառով երեկվանից 350-ից ավելի դպրոց փակվել է: Խոսքը քաղաքի դպրոցների ավելի քան 80%-ի մասին է, որոնք 31 վարչական շրջաններում են գտնվում։ Կորոնավիրուսի համավարակից հետո դպրոցները նման մասշտաբներով չէին փակվել։ Այս մասին հաղորդում է Bangkok Post-ը։
Երեկ Բանգկոկի օդում փոշու մանր մասնիկների (PM2.5) խտությունը հասել է 108 մկգ/մ³։ Այս մասնիկները շուրջ 30 անգամ փոքր են մարդու մազի տրամագծից և չափազանց վտանգավոր են առողջության համար: Սրանք կարող են ներթափանցել մարդու շնչառական համակարգ և անցնել արյան մեջ։ Առողջապահության համաշխարհային կազմակերպությունը սահմանել է, որ 24-ժամյա միջին ցուցանիշը չպետք է գերազանցի 15 միկրոգրամը:
Բանգկոկի քաղաքային իշխանության որոշմամբ՝ այսօրվանից հասարակական տրանսպորտը մեկ շաբաթ կլինի անվճար։ Այս քայլով փորձ է արվում կրճատել տրանսպորտային հոսքը քաղաքի փողոցներում՝ նվազեցնելով վնասակար արտանետումների ծավալը: Իշխանությունները հորդորում են մարդկանց աշխատել տնից:
Վերջին ամիսներին սոցիալական ցանցերում ակտիվացել են նաև Երևանի օդի աղտոտվածության բարձր մակարդակի մասին խոսակցությունները։ Ըստ ԱՀԿ-ի՝ Հայաստանի օդում PM2.5-ի մակարդակը 9 անգամ բարձր է սահմանային թույլատրելի արժեքից։
Այս պահին միջազգային հիդրոօդերևութաբանական հարթակների ու Երևանի քաղաքապետարանի կայքում ներկայացված տվյալները ցույց են տալիս օդի աղտոտվածության միջին մակարդակ, որը վտանգավոր է զգայուն խմբերի համար։ Դեկտեմբերի սկզբին Երևանի օդում փոշու մանր մասնիկների (PM2.5) խտությունը հասել էր 90 մկգ/մ³-ի։
Լուսանկարը՝ AFP-ի
Մեկնաբանել