Տեսանյութեր
Լուսանկարներ
ԱՄՆ-ն սառեցնում է միջազգային օգնության ծրագրերի ֆինանսավորումը
Դոնալդ Թրամփի վարչակազմը հայտարարել է միջազգային օգնության ծրագրերի գրեթե ամբողջական սառեցման մասին։
ԱՄՆ պետքարտուղար Մարկո Ռուբիոն նոր հուշագրով բոլոր ավագ պաշտոնյաներին հրահանգել է համոզվել, որ «օրենքով թույլատրված առավելագույն չափով օտարերկրյա օգնության նոր պարտավորություններ չեն ստանձնվի»։
Ըստ հուշագրի` ժամանակավոր սառեցումը գործելու է առնվազն երեք ամիս։ Առաջին 85 օրվա ընթացքում Ռուբիոն պետք է որոշում կայացնի՝ շարունակել, փոփոխել կամ ընդհանրապես դադարեցնել միջազգային օգնության ծրագրերը։
ԱՄՆ-ն աշխարհում ամենամեծ օգնություն տրամադրող երկիրն է։ 2023 թվականի ֆինանսական տարում այն տրամադրել է 72 միլիարդ դոլարի օգնություն։
Մարդասիրական կազմակերպությունները անմիջապես արձագանքել են այս որոշմանը և մտահոգություն են հայտնել, որ որոշումը կարող է նպաստել գլոբալ անկայունությանն ու վտանգել հազարավոր մարդկանց կյանքեր։
«Սա խելագարություն է»,– ասել է ԱՄՆ Միջազգային զարգացման գործակալության (USAID) նախկին պաշտոնյա Ջերեմի Կոնինդիկը Reuters-ին տված հարցազրույցում։ «Սա մարդկանց կսպանի։ Ես նկատի ունեմ, եթե դա իրականացվի այնպես, ինչպես գրված է այդ հուշագրում, շատ մարդիկ կմահանան»։
Օքսֆամ Ամերիկայի ղեկավար Աբի Մաքսմանը մեկնաբանել է այս որոշումը. «Օտարերկրյա զարգացման օգնությունը դադարեցնելով` Թրամփի վարչակազմը սպառնում է ճգնաժամային իրավիճակում գտնվող համայնքներին և դրանց ապագային»։
Օգնության ծրագրերի ժամանակավոր դադարեցումը չի վերաբերում Իսրայելին և Եգիպտոսին՝ ԱՄՆ-ից ամենաշատ ռազմական օգնություն ստացող երկրներին։
Ուկրաինայի համար նման բացառություն հուշագրում նշված չէ։
Մեկնաբանել