ԱՄՆ նախագահ Դոնալդ Թրամփը Իսրայելի վարչապետ Բենյամին Նեթանյահուի հետ հանդիպումից հետո մամուլի ասուլիսի ժամանակ հայտարարել է, որ ԱՄՆ-ն պատրաստվում է «գրավել» պատերազմից քայքայված Գազան և «սեփականացնել այն»՝ ըստ էության աջակցելով պաղեստինցիների էթնիկ զտման գաղափարին։ 

Այս շոկային հայտարարությունը բողոքի մեծ ալիք է բարձրացրել ամբողջ աշխարհում։

Թրամփը պնդել է, որ Գազան կարող է դառնալ «Միջին Արևելքի Ռիվիերան»։ Նա չի բացառել նաև, որ ԱՄՆ-ն այդ նպատակով կարող է զորքեր ուղարկել Գազա։

«Պաղեստինցիները ցանկանում են վերադառնալ Գազա միայն այն պատճառով, որ այլընտրանք չունեն»,– ասել է Թրամփը։ 

To Muslims who sat out the election because Kamala Harris was too ‘pro-Israel’:

How do you feel now that the guy who beat Harris by a sliver just called for
what appears to be the ethnic cleansing of 1.7 million Muslims in Gaza and for the US to take over the Gaza Strip. pic.twitter.com/SCfzOCT1fy

— Brian Krassenstein (@krassenstein) February 5, 2025

Պնդելով, որ պաղեստինցիները ուրիշ տեղ կարող են ապրել իրենց կյանքը «խաղաղությամբ և համերաշխությամբ»՝ Թրամփն ասել է. «ԱՄՆ-ը կգրավի Գազայի հատվածը, և մենք մեր աշխատանքը կանենք այնտեղ։ Մենք այն կսեփականացնենք և պատասխանատու կլինենք տարածքում գտնվող բոլոր վտանգավոր չպայթած ռումբերի ու մյուս զինատեսակների վնասազերծման համար»։

«Եթե անհրաժեշտ լինի, մենք դա կանենք, մենք կգրավենք այդ տարածքը, այն կզարգացնենք, կստեղծենք հազարավոր աշխատատեղեր, և դա կլինի մի բան, որով ամբողջ Միջին Արևելքը կկարողանա հպարտանալ»,-ասել է նա։

Թրամփը հայտարարել է , որ ինքը կաջակցի պաղեստինցիների «մշտական» վերաբնակեցմանը, սակայն մանրամասներ չի հայտնել, թե ինչպես։

Լրագրողների հարցին, թե արդյոք այս ծրագիրը կարող է ներառել ԱՄՆ ռազմական ուժի կիրառում, Թրամփն ասել է. «Ինչ վերաբերում է Գազային, մենք կանենք այն, ինչ անհրաժեշտ է»։

Այն հարցին, թե ինչպես և ինչ իրավասությամբ կարող է ԱՄՆ-ը բռնագրավել և երկարաժամկետ կերպով օկուպացնել Գազայի տարածքը, Թրամփը ուղիղ պատասխան չի տվել։

«Ես տեսնում եմ երկարաժամկետ սեփականացման հնարավորություն և կարծում եմ, որ դա մեծ կայունություն կբերի Միջին Արևելքի այդ հատվածին, և գուցե ամբողջ տարածաշրջանին»,– ասել է ԱՄՆ նախագահը՝ պնդելով, թե խոսել է տարածաշրջանի ղեկավարների հետ, որոնք աջակցում են գաղափարին։ 

Թրամփի խոսքով՝ Գազայի պաղեստինցիները պետք է տեղավորվեն այլ երկրներում։ Թրամփը հույս է հայտնել, որ Եգիպտոսի և Հորդանանի առաջնորդները ժամանակի ընթացքում «կբացեն իրենց սրտերը» այս գաղափարի հանդեպ։

Հարցին, թե ով պետք է բնակվի վերակառուցված Գազայում, Թրամփն ասել է, որ տարածքը կարող է դառնալ «աշխարհի մարդկանց» տուն։ Նրա կարծիքով՝ տարածքը կարող է դառնալ Միջին Արևելքի Ռիվիերա։

Նեթանյահուն, որը Թրամփին անվանել է «Իսրայելի երբևե ունեցած ամենամեծ բարեկամը», աջակցություն է հայտնել այս գաղափարին։ «Թրամփը մտածում է սահմաններից դուրս»,-ասել է նա։

Այս հայտարարությունից հետո տասնյակ երկրների ղեկավարներ կոշտ քննադատել են Թրամփի գաղափարը։ Գազայի բնակչության հարկադիր տեղահանությունը կարող է համարվել էթնիկ զտում, ինչը միջազգային իրավունքի խախտում է։ 

Գլխավոր լուսանկարը՝ Leah Millis/Reuters