ՀՀ կառավարությունը 2021 թվականին հաստատել էր աղբահանության համակարգի ռազմավարությունը, որի նպատակը հանրապետության ողջ տարածքում գոյացող աղբի հավաքման, տեղափոխման և անվտանգ հեռացման կամ օգտահանման ու վերամշակման կայուն համակարգի ներդրումն էր։

Ռազմավարությամբ ամրագրվել է գոյացող աղբի քանակի կրճատում սկզբնաղբյուրում, վերամշակման, վերականգնման և այլ մեխանիզմների ներդրում։

2021-2023 թվականների համար նախատեսվել էին կարճաժամկետ միջոցառումներ՝ ուղղված ոլորտի օրենսդրական և նորմատիվա-տեխնիկական դաշտի բարելավմանը։ Հաստատվել են մի շարք կարգավորումներ, որոնք թույլ են տալիս ներդնել ԵՄ չափանիշներին համապատասխան համակարգեր։ Այժմ ռազմավարության դրույթների իրագործման նպատակով անհրաժեշտություն է առաջացել մշակել և իրականացնել աղբահանության ռազմավարության միջոցառումներ և ներդրումային ծրագրեր։

Նոր նախագծով առաջարկվում է թափոնների տեսակավորման և առանձին հավաքման մեխանիզմներ ներդնել․ ձևավորել թափոնների ընդունման կետեր, ապահովել թափոնների հոսքը վերամշակման արտադրություններ։

Հանրապետության աղբահանության և կոշտ թափոնների կառավարման գոտիավորված տարածքների տեխնիկա-տնտեսական ուսումնասիրություններ են նախատեսվում։ Հյուսիսային, հարավային և կենտրոնական․ յուրաքանչյուր գոտում նախատեսվում է աղբավայրերի կայանների տեղադիրքերի որոշում, ինստիտուցիոնալ ու ֆինանսական գնահատականների ապահովում։ Այնուհետև նախատեսում են ներդրումային ծրագրեր իրականացնել՝ յուրաքանչյուր գոտու համար ԵՄ չափանիշներին համապատասխան աղբավայրերի և փոխաբեռնման կայաններ կառուցելու, հնարավոր վերամշակման ենթակառուցվածքներ ստեղծելու և այլն։

Տարածքային կառավարման և ենթակառուցվածքների նախարարության կարծիքով՝ ինտեգրված և կայուն աղբահանության համակարգ կներդրվի երկրում:

Լուսանկարը՝ «Հետքի»