Հայաստանի ֆուտբոլի ֆեդերացիան այսօր հայտնեց, որ ֆուտբոլի ազգային հավաքականը հունիսի 6-ին ընկերական հանդիպում է անցկացնելու Կոսովոյի ընտրանու հետ վերջինիս դաշտում՝ Պրիշտինայում: Խաղը մեկնարկելու է Երեւանի ժամանակով 21:00-ին: 

Սա կլինի 3-րդ ընկերական հանդիպումը Կոսովոյի հետ: Պաշտոնական խաղեր թիմերը չեն անցկացրել:

Առաջին անգամ մեր ընտրանին բալկանյան այս հավաքականին հանդիպել է 2022 թ. նոյեմբերի 16-ին Պրիշտինայում: Չնայած Հայաստանի հավաքականը երկու անգամ առջեւում էր հաշվի մեջ, այդուհանդերձ, խաղն ավարտվեց 2-2: Մեր թիմից գոլերը խփեցին Ժիրայր Շաղոյանն ու Կամո Հովհաննիսյանը: Երկրորդ ընկերական մրցավեճը կայացել է 2024-ի մարտի 22-ին Երեւանում եւ ավարտվել հյուրերի 1-0 հաշվով հաղթանակով: 

Այս պահին ՖԻՖԱ-ի վարկանիշային դասակարգման աղյուսակում Հայաստանն ու Կոսովոն անմիջական հարեւաններ են: Մեր ընտրանին 1219,15 վարկանիշային միավորով 100-րդն է, իսկ Կոսովոն՝ 1219,82 միավորով 99-րդը: 

Հիշեցնենք, որ մինչեւ Կոսովոյի հետ խաղը՝ մարտի 20-ին ու 23-ին, մեր թիմը Ազգերի լիգայի փլեյ-օֆ փուլի շրջանակներում 2 հանդիպում կանցկացնի Վրաստանի ընտրանու հետ: Մարտի 20-ի խաղը կկայանա Երեւանի «Հանրապետական» մարզադաշտում ու կմեկնարկի 21:00-ին, իսկ պատասխան հանդիպումը կմեկնարկի ամսի 23-ին՝ 18:00-ին, Թբիլիսիի Բորիս Պայճաձեի անվան մարզադաշտում: Երկու խաղերի վերջնարդյունքով հաղթողն իրավունք կունենա Ազգերի լիգայի 2026-2027 թթ. խաղարկությանը հանդես գալ B լիգայում, իսկ պարտվողը կխաղա C լիգայում: Եթե այս պահին Հայաստանը ՖԻՖԱ-ի վարկանիշով 100-րդն է, ապա Վրաստանը 68-րդ հորիզոնականում է:  

Լուսանկարը՝ ՀՖՖ-ի