Հերթական աշխատանքային խորհրդակցության ընթացքում Երևանի քաղաքապետ Տարոն Մարգարյանը, անդրադառնալով մայրաքաղաքում ավտոկայանման համար գանձվող գումարների մասով քաղաքացիների կողմից բարձրացվող դժգոհություններին, նշել է, որ ստեղծվել է աշխատանքային խումբ, որը գույքագրում և ուսումնասիրում է ավտոկայանման համար տրամադրված բոլոր պայմանագրերը, այդ թվում նաև պարզելու համար, թե արդյոք միայն տրամադրված տարածքում է իրականացվում տվյալ գործունեությունը:

«Այսօր մայրաքաղաքի` հատկապես Կենտրոն վարչական շրջանում ավտոկայանատեղերի հետ կապված խայտառակ իրավիճակ է: Ավտոմեքենան դեռ չկայանած գումար են պահանջում: Ընդ որում, ինչպես ցույց են տալիս ուսումնասիրության արդյունքները, շատ հաճախ անօրինական գումարներ են գանձվում մեր քաղաքացիներից: Երկու-երեք օր է, ինչ համապատասխան աշխատանքային խումբը գույքագրման աշխատանքներ է իրականացնում այդ ուղղությամբ և մոտ 80 տոկոսով պակասել է կենտրոնում գումար գանձողների թիվը: Մեր նպատակն այն է, որ մեր քաղաքացիները կարողանան հանգիստ կայանեն իրենց մեքենաներն ու մտնեն խանութ կամ սրճարան և, ընդհանրապես, ուր ցանկանան: Ոչ ոք իրավունք չունի որտեղ պատահի գումար գանձի ավտոկայանման համար»,- ընդգծել է քաղաքապետը և հանձնարարել Կենտրոն վարչական շրջանի աշխատակազմին այդ ուղղությամբ հետևողական աշխատանք տանել ու բացահայտել ապօրինի գումար գանձողներին և ճանապարհային ոստիկանության ու Ոստիկանության Երևան քաղաքի վարչության հետ համատեղ օրենքով սահմանված կարգով քայլեր ձեռնարկել դրանց պատասխանատվության ենթարկելու ուղղությամբ, ընդհուպ ապօրինի գումարներ գանձելու համար քրեական պատասխանատվության ենթարկում:

Այս մասով Տարոն Մարգարյանը նաև տրանսպորտի վարչության պետին է հանձնարարել ճանապարհային ոստիկանության հետ համատեղ մշակել ավտոկայանատեղիների համար սահմանված վայրերի քարտեզն ու ըստ այդմ կնքել նոր պայմանագրերը:

Անդրադառնալով Երևանի քաղաքապետարանի սոցիալական ապահովության վարչությանը և վարչական շրջանների աշխատակազմերի սոցիալական բաժիններին քաղաքացիների կողմից ուղղված դիմում-բողոքներին, քաղաքապետ Տարոն Մարգարյանը հանձնարարել է ուսումնասիրել դրանք և հստակ քայլեր ձեռնարկել դրանց ընթացք տալու ուղղությամբ. «Հատկապես սոցիալապես անապահով մեր բնակիչների կողմից բարձրացվող որևէ հարց անպատասխան չպետք է մնա: Սա հստակ պահանջ է, որով պետք է առաջնորդվեն բոլոր սոցիալական ծառայությունները»,- ընդգծել է քաղաքապետը և հորդորել այս հարցում լինել խիստ և հետևողական: 

Քաղաքապետին զեկուցվել է, որ շարունակվում է հասարակական ավտոտրանսպորտային միջոցների սպասարկման որակի ուղղությամբ ամենօրյա հսկողությունը: Բացի այդ, ընթացքի մեջ է նաև Երևանի ներքաղաքային ավտոբուսային և միկրոավտոբուսային կանոնավոր փոխադրումների երթուղիների մրցույթների անցկացումը: 

Անդրադառնալով քաղաքապետարան - վարչական շրջաններ - համատիրություն համատեղ ծրագրով իրականացվող բազմաբնակարան բնակելի շենքերի շքամուտքերի վերանորոգման աշխատանքների ընթացքին` կոմունալ տնտեսության վարչության պետը զեկուցել է, որ արդեն վերանորոգվել է 875 շքամուտք: Զեկուցվել է նաև, որ աշխատանքների որակի ապահովման նպատակով կատարվում են ստուգայցեր, և հայտնաբերված թերությունները տեղում վերացվում են: 

Սահմանված ժամանակացույցի համաձայն շարունակվում են մայրաքաղաքի կենտրոնական փողոցների, այգիների ու պուրակների ցայտաղբյուրների վերանորոգման ու վերագործարկման աշխատանքները: Քաղաքապետ Տարոն Մարգարյանի հանձնարարությամբ ծրագրում ներառվել և բարեկարգվում են նաև բակային տարածքներում առկա ցայտաղբյուրները: 

Երևանի արտաքին տեսքի բարեկարգման 2012թ.-ի ծրագրի շրջանակում արդեն  ավարտվել են շուրջ վեց տասնյակ կամարանցումների բարեկարգման ու նկարազարդման աշխատանքները: Քաղաքապետ Տարոն Մարգարյանի հանձնարարությամբ լրացուցիչ ծրագրով մինչև տարեվերջ կբարեկարգվեն ու կնկարազարդվեն նաև երևանյան դեռևս չնկարազարդված մյուս բոլոր կամարանցումները ևս, որով էլ ծրագիրը կամբողջանա: 

Զեկուցվել է, որ ավարտական փուլում են մայրաքաղաքի այգիներում և պուրակներում գիշերային լուսավորության ապահովման ուղղությամբ տարվող աշխատանքները, որոնք իրականացվում են տարածքները վարձակալած տնտեսվարողների հետ համատեղ: 

Անդրադառնալով բացօթյա ապօրինի առևտրի արգելման և կանխարգելման աշխատանքներին, ինչպես նաև ապօրինի շինությունների քանդման և հողազավթումների կանխման գործընթացին` քաղաքապետ Տարոն Մարգարյանը  համապատասխան կառույցների առջև խնդիր է դրել հետևողականորեն շարունակել աշխատանքները: 

Զեկուցվել է, որ մայրաքաղաքի 12 վարչական շրջաններում շարունակվում են  բազմաբնակարան շենքերի պատերին, հենասյուներին և հասարակական նշանակություն ունեցող այլ վայրերում փակցված հայտարարությունների ու պաստառների մաքրման աշխատանքները: Քաղաքապետի հանձնարարությամբ առաջիկայում սահմանազատված վայրերում հայտարարությունների համար կտեղադրվեն համապատասխան ցուցատախտակներ: 

Մայրաքաղաքի բոլոր վարչական շրջաններում շարունակվում են նաև  ամենշաբաթյա շաբաթօրյակները, որոնց շրջանակում իրականացվում են բակերի և դրանց հարակից տարածքների սանմաքրման աշխատանքներ:  Այս մասին հայտնում է Երևանի քաղաքապետարանի տեղեկատվության և հասարակայնության հետ կապերի վարչությունը: