Գյումրու ավագանու արտահերթ ընտրություններում առաջադրված «Քաղաքացիական պայմանագիր» կուսակցության թեկնածու Սարիկ Մինասյանը ֆեյսբուքյան իր էջում շնորհակալություն է հայտնել գյումրեցիներին իրեն տված ձայների համար։

«Հարգելի՛ գյումրեցիներ, սիրելի՛ համաքաղաքացիներ, շնորհակալ եմ յուրաքանչյուրիդ քվեի, յուրաքանչյուրիդ վստահության և պատվախնդրության համար:

Մեզ համար մարդը բարձրագույն արժեք է, մեր սկզբունքներում տեղ չունեն սպառնալիքը, պարտադրանքը, խաբեությունը, ցինիզմն ու սուտը:

Սիրելի՛ գյումրեցիներ, պարտավորված ենք ձեր վստահության համար, որն ի ցույց եք դրել ապահովելով կրկնակի քվեներ` ի համեմատություն շեմը հաղթահարած 2-րդ ուժի:

Մեզ տրված քվեները չենք փոշիացնելու, այն ծառայելու է Գյումրուն ու բոլոր գյումրեցիներին:

Շարունակելու ենք Գյումրու զարգացման և շենացման մեր բոլոր ծրագրերը»,- ասված է գրառման մեջ:

Հիշեցնենք, որ երեկ տեղի ունեցած ընտրություններում պայքարող քաղաքական ուժերից ոչ մեկին չի հաջողվել մեծամասնություն կազմել։ Ընդդիմադիր երկու ուժ որոշել է միանալ Հայաստանի կոմունիստական կուսակցության ցուցակը գլխավորող Վարդան Ղուկասյանին։

Լուսանկարը՝ Սարիկ Մինասյանի ֆեյսբուքյան էջից