Հակակոռուպցիոն դատարանը վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումը: Այս մասին տեղեկացնում է Գլխավոր դատախազությունը։

«Գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին՝ վառելիքի ներկրմամբ զբաղվող սահմանափակ պատասխանատվությամբ ընկերության սեփականատեր Կամո Մելքոնյանից և նրան փոխկապակցված անձանցից հօգուտ Հայաստանի Հանրապետության բռնագանձել՝

• 14 անշարժ գույք, որից 10-ը՝ Երևանում, 4-ը՝ մարզերում 
• Երևանում գտնվող 6 անշարժ գույքի գնման իրավունք
• 6 տրանսպորտային միջոց
• 4 իրավաբանական անձանցում մասնակցություն
• 59 մլն 518 հազար դրամ՝ որպես ապօրինի եկամտի և միջոցների մնացորդ»,- նշված է հաղորդագրության մեջ։