«Ակտիվ քաղաքացի» բջջային հավելվածի միջոցով այսուհետ քաղաքացիները կարող են բարձրաձայնել նաև «Վեոլիա Ջուր» ընկերությանն առնչվող խնդիրների մասին: Ընկերությունը միացել է հարթակին: Այս մասին հայտնում են Երևանի քաղաքապետարանից։

***
Երևանի քաղաքապետարանում ներդրված աշխարհագրական տեղեկատվական GIS համակարգում ստեղծված հարթակները համալրվում են նոր տվյալներով.  արդեն իսկ ըստ տեղադիրքի տեսանելի են սուրճի, սննդի և վճարային տերմինալների տվյալները: Մշակվել է նաև հարթակ՝ տրամադրված շինթույլտվություններով կապուղիների հետագծերը, ժամկետները, աշխատանքների ընթացքն ու որակը վերահսկելու համար: Քարտեզավորման գործընթացով հսկողություն կիրականացվի նաև մայրաքաղաքում աղբահանության կազմակերպման ոլորտում՝ աղբատար մեքենաների աղբամաններին մոտենալուց մինչև աղբի տեղափոխում: 

«Թվայնացման այս գործիքները մեզ էականորեն նոր ժամանակաշրջան են տեղափոխում և այն աշխատանքները, որոնք հիմա իրականացվում են GIS համակարգի տեխնոլոգիաները օգտագործելով, Երևանի կառավարման տեսանկյունից էականորեն բարձրացնում են մեր աշխատանքը արդյունավետությունը: Այս վերլուծությունների շնորհիվ մեր աշխատանքն էլ ավելի կպարզեցվի, կհեշտացվի, և երևանցիներն էականորեն ավելի գոհ կլինեն մեր աշխատանքից»,- նշել է քաղաքապետը:  

***
Նախորդ շաբաթվա ընթացքում տոմսային համակարգում արձանագրված վավերացումների քանակը տրոլեյբուսներում կազմել է 88 հազար 150, մետրոպոլիտենում՝ 505 հազար 257, ավտոբուսներում՝ 1 մլն 831 հազար 196: Նախորդ շաբաթվա համեմատ դրական տարբերությունը՝ 7655:

***
Երևանի մետրոպոլիտենում գործարկումից ի վեր առաջին անգամ փոխարինվում են շարժասանդուղքները:  «Սասունցի Դավիթ» կայարանում աշխատանքներն ավարտվել են: Գործընթացն այս պահին շարունակվում է «Զորավար Անդրանիկ» կայարանում: Հաճախ աչքի չընկող այս աշխատանքների հիմնական նպատակը երևանյան մետրոյի ու ուղևորների անվտանգությունն ապահովելն է: 

***
Տարեսկզբից Երևանում արդեն իսկ շուրջ 10 կմ ոռոգման նոր համակարգ է անցկացվել: 2025թ. ընդհանուր առմամբ 25 կմ նոր ցանց կանցկացվի: Քաղաքային ծառատունկի ընթացքում շուրջ 1300 ծառ և ավելի քան 200 մշտադալար թուփ է տնկվել, իսկ այս շաբաթ նոր անտառային գոտի կստեղծվի Երևանի մուտքերից մեկի մոտ՝ Աշտարակից Երևան մտնող ավտոճանապարհին հարող լանջերին: Քաղաքը ձեռք է բերել մոտ 10 հազար մշտադալար թփեր, որոնք այս պահին լրացվում են Երևանում. ևս 40 հազարն  արտադրվել է համայնքային տնկարանային տնտեսությունում: Վերջին երկուսուկես տարում Երևանում 20 հազարից ավելի ծառ է տնկվել, այս տարվա ընթացքում այդ թիվը կմոտենա 25 հազարի: Կենտրոն վարչական շրջանում 35 հա-ում նախատեսվում է ծառատունկ. ծրագիրը կմեկնարկի Կենդանաբանական այգուց և կավարտվի Գայի պողոտայում: Մինչ այս պահն այդ 35 հա-ում ցանկապատերից ազատվել են զավթված հողերը, ինչպես նաև քանդվել քոլիկանման շինություններ: 

***

2022-2025թթ. ընթացքում Երևանում ընդհանուր առմամբ արտաքին գովազդի 21 հազար 902 կրիչ է ապամոնտաժվել, որոնցից 588-ը՝ մեծ տեղեկատու դաշտով: Արտաքին գովազդի տեղադրման նոր թույլտվություններն, ի դեպ, հիմնականում վերաբերում են ոչ թե նոր տեղերում գովազդի տեղադրմանը, այլ հին կրիչները նորերով փոխարինելու գործընթաց է իրականացվում: Քաղաքապետ Տիգրան Ավինյանը հանձնարարել է աշխատանքներ տանել, որ Երևանի ավագանու որոշմամբ հետագայում բացառվի սիզամարգերի հատվածներում արտաքին գովազդ տեղադրելու թույլտվության տրամադրումը, նորմատիվային մյուս փոփոխությունն էլ մեկ խաչմերուկում բազմաթիվ կրիչների տեղադրմանը կվերաբերի: