Կոռուպցիայի կանխարգելման հանձնաժողովն ապրիլի 8-ի նիստում որոշում է կայացրել 300 հազար դրամի չափով վարչական տույժ կիրառել Շիրակի մարզի Ախուրյան համայնքի ղեկավար Զավեն Մանուկյանի նկատմամբ։

ԿԿՀ-ն ուսումնասիրել է «Հետքի» «Ախուրյանի ավագանու ՔՊ խմբակցության ղեկավար Մարտիկ Մաթոսյանը 99 պայմանագիր է կնքել համայնքի և այլ պետական կառույցների հետ» վերտառությամբ հոդվածը։

«Հետքը» 2024թ․ դեկտեմբերին գրել էր, որ Ախուրյանի ավագանու ՔՊ խմբակցության ղեկավար Մարտիկ Մաթոսյանին եւ նրա մորը պատկանող «Սոֆոն» և «Սմարթվեյվ» ՍՊԸ-ները 2021-2024 թթ.-ին պետական տարբեր գերատեսչությունների եւ տեղական ինքնակառավարման մարմինների հետ կնքել են 99 պայմանագիր։ Պայմանագրերի ընդհանուր գումարը կազմել է 125,5 մլն դրամ։

Այս ընկերությունները համայնքներին և պետական գերատեսչություններին մատակարարել են համակարգիչներ և համակարգչային սարքավորումներ, սկանավորման և բազմաֆունկցիոնալ տպիչ սարքեր։

Հանձնաժողովը պարզել է, որ համայնքի ղեկավարը խախտել է «Հանրային ծառայության մասին» օրենքի 33-րդ հոդվածի 7-րդ մասի պահանջները։

Համաձայն «Հանրային ծառայության մասին» օրենքի 33-րդ հոդվածի 5-րդ մասի, եթե պաշտոն զբաղեցնող անձի կողմից իր լիազորությունների շրջանակներում գործողության կատարումը (անգործությունը) կամ որոշման ընդունումը կարող է հանգեցնել շահերի բախման իրավիճակի առաջացման, ապա վերջինս պարտավոր է իր վերադասին կամ անմիջական ղեկավարին ներկայացնել գրավոր հայտարարություն՝ շահերի բախմանը վերաբերող հանգամանքների մասին։

«Հանրային ծառայության մասին» օրենքի 33-րդ հոդվածի 7-րդ մասի համաձայն, եթե քաղաքական պաշտոն զբացեցնող անձը չունի վերադաս կամ անմիջական ղեկավար, ապա շահերի բախմանը վերաբերող հանգամանքների մասին հայտարարությունը պետք է 10-օրյա ժամկետում ներկայացնի Կոռուպցիայի կանխարգելման հանձնաժողովին։

«Սույն գործով առկա հանգամանքների համադրման արդյունքում Հանձնաժողովը եզրահանգում է, որ Զավեն Մանուկյանի կողմից իր պաշտոնեական պարտականությունների անաչառ և օբյեկտիվ կատարումն ապահովելու նպատակով չեն ձեռնարկվել օրենքով սահմանված համապատասխան գործողություններ շահերի բախման իրավիճակում չհայտնվելու կամ հնարավոր նման իրավիճակում հայտնվելու պարագայում օրենքով նախատեսված կանխարգելման ընթացակարգերով առաջնորդվելու ուղղությամբ»,- նշված է ԿԿՀ-ի որոման մեջ։

Վարչական վարույթի քննության ընթացքում Ախուրյանի համայնքապետ Զավեն Մանուկյանի ներկայացուցիչները ասել են, որ Մանուկյանը պայմանագիրը կնքելիս առաջնորդվել է «Գնումների մասին» օրենքով և պայմանագիրը կնքելու ժամանակ չի իմացել, որ «Սմարթվեյվ» ընկերության սեփականատերը Մարտիկ Մաթոսյանն է։