Հայաստանի թիմն արծաթե մեդալ է նվաճել քիմիայի Մենդելեևյան 59-րդ միջազգային օլիմպիադայում, որն անցկացվել է մայիսի 5-13-ը Բրազիլիայի Բելու-Օրիզոնտի քաղաքում:

ԿԳՄՍ նախարարության հաղորդագրության համաձայն՝ օլիմպիադային, որն անցկացվել է  3 փուլով՝ 2 տեսական և 1 փորձնական, մասնակցել է 40 երկրի 190 ներկայացուցիչ։

Հայաստանի թիմը ներկայացրել են Վանաձորի մաթեմատիկայի և բնագիտական առարկաների խորացված ուսուցմամբ հատուկ դպրոցի 12-րդ դասարանի աշակերտ Արման Խառատյանը և Գյումրու «Ֆոտոն» վարժարանի 12-րդ դասարանի աշակերտ Սևադա Հարությունյանը։ Թիմը ղեկավարել է ՀՀ ԳԱԱ օրգանական և դեղագործական քիմիայի գիտատեխնոլոգիական կենտրոնի աշխատակից, քիմիայի հանրապետական օլիմպիադայի հանձնաժողովի նախագահ Անդրանիկ Դավինյանը։

Օլիմպիադայում Արման Խառատյանն արժանացել է արծաթե մեդալի: 

Հիշեցնենք, որ նախորդ՝ 58-րդ Մենդելեևյան օլիմպիադայում, որն անցկացվել էր Չինաստանի Շենչժեն քաղաքում, ՀՀ թիմը նվաճել էր մեկ արծաթե և երկու բրոնզե մեդալներ: Մենդելեևյան միջազգային օլիմպիադաներում Հայաստանի թիմը, ըմնդհանուր առմամբ, արժանացել է 45 մեդալի (1 ոսկե, 9 արծաթե և 35 բրոնզե):

Մենդելեևյան 59-րդ միջազգային օլիմպիադայի վերաբերյալ լրացուցիչ նյութերը հասանելի են հետևյալ հարթակներում՝ 

• պաշտոնական կայքը՝ https://mendeleevolympiad.org/en,
• ֆեյսբուքյան էջը՝ https://www.facebook.com/mendeleevolympiad,
• բացման արարողությունը VK-ում՝ https://tinyurl.com/2pkeyymw,  
• փակման արարողությունը YOUTUBE-ում՝ https://tinyurl.com/2swc2fj7: