Այսօր առավոտից Գորիսում մեկնարկել է Հայաստան - Ֆրանսիա ապակենտրոնացված համագործակցության համաժողովը։ Այս մասին հայտնում է Սյունիքի մարզպետարանի մամուլի ծառայությունը։

«Հերթական (5-րդ) համաժողովի անցկացման վայր է ընտրվել Գորիս քաղաքը՝ հաշվի առնելով Սյունիքի ռազմավարական կարևորությունը, Սյունիքի մարզի և Ֆրանսիայի Օվերն-Ռոն-Ալպ ռեգիոնի միջև ընդգրկուն և օրինակելի համագործակցությունը:

Համաժողովին մասնակցելու համար Ֆրանսիայից Հայաստան ժամանող հյուրերի թվում են քաղաքապետներ, մարզային պատվիրակություններ, խորհրդարանականներ՝ ներառյալ Ֆրանսիայի Ազգային ժողովի և Սենատի Հայաստան-Ֆրանսիա բարեկամական խմբերի ներկայացուցիչներ, Ֆրանսիայի Օվերն-Ռոն-Ալպ ռեգիոնի նախագահ Ֆաբրիս Պանկուկը:

Հայկական կողմից մասնակցելու են ՀՀ ԱԳ, ՏԿԵ, Էկոնոմիկայի, ԿԳՄՍ,   Աշխատանքի և սոցիալական հարցերի նախարարությունների, Երևանի քաղաքապետարանի ներկայացուցիչներ, Սյունիքի մարզպետի աշխատակազմը, ԱԺ պատգամավորներ,  հյուրեր ՀՀ այլ մարզերից ու համայնքներից:

Համաժողովի բացմանը ելույթ են ունեցել  ՀՀ տարածքային կառավարման և ենթակառուցվածքների նախարար Դավիթ Խուդաթյանը, ՀՀ արտաքին գործերի նախարարի տեղակալ Վահան Կոստանյանը, Հայաստանի համայնքների միության գլխավոր քարտուղար  Էմին Երիցյանը, Լիոնի քաղաքապետի տեղակալ, Ֆրանսիայի միավորված համայնքների «Հայաստան» խմբի նախագահ Սոնիա Զդորոֆցովը:

Համաժողովը համատեղ կազմակերպել են ՀՀ արտաքին գործերի նախարարությունը,  Ֆրանսիայի Եվրոպայի և արտաքին գործերի նախարարությունը,  ՀՀ տարածքային կառավարման և ենթակառուցվածքների նախարարությունը, Ֆրանսիայի միավորված համայնքները, Սյունիքի մարզպետի աշխատակազմը, Գորիսի համայնքապետարանը»,-նշված է հաղորդագրությունում։