«Հետաքննող լրագրողներ» հասարակական կազմակերպությունը հետազոտությունների իրականացմամբ զբաղվող անհատներին/կազմակերպություններին հրավիրում է մասնակցել հայկական մեդիա շուկայի հետազոտության իրականացման բաց մրցույթին։

Հետազոտության նպատակ։ Հայկական մեդիա շուկայի հետազոտության իրականացման հիմնական նպատակն է հասկանալ հայկական մեդիա տիրույթի ընդհանուր պատկերը, առկա միտումներն ու հնարավորությունները, հիմնական մարտահրավերները, ինչպես նաև այն պահանջարկը, որը լսարանն ունի մեդիա շուկայից։

Տեխնիկական առաջադրանք։

1. Մշակել մեթոդաբանություն և ըստ այդմ իրականացնել հայկական մեդիա շուկայի հետազոտություն ու վերլուծություն,
2. Ուսումնասիրել առցանց մեդիայի միտումներն ու հնարավորությունները,
3. Պարզել շուկայում առկա հիմնական բացերն ու խնդիրները, վերհանել հիմնական մարտահրավերները,
4. Հասկանալ այն կարիքները, որոնք առկա են շուկայում,
5. Վերլուծել մեդիա շուկայի վերաբերյալ տարբեր դերակատարների, այդ թվում՝ գովազդատուների, ընթերցողների, պետական գերատեսչությունների ակնկալիքները,
6. Պատրաստել մանրակրկիտ զեկույց ուսումնասիրության արդյունքների վերաբերյալ և ներկայացնել առաջարկություններ։

Հետազոտության ժամանակահատված։ Հետազոտական աշխատանքը նախատեսվում է սկսել 2025 թվականի հուլիսի 10-ից և ավարտել մինչև 2025 թվականի սեպտեմբերի 30-ը։

Մրցույթին մասնակցության պայմաններ: Հետազոտությունն իրականացնող անձը կամ կազմակերպությունը պետք է.

1. մասնագիտացած լինի հետազոտությունների իրականացման և ռազմավարական պլանավորման մեջ,
2. վերջին հինգ տարիներին Հայաստանում մատուցած լինի նմանատիպ ծառայություններ (գնահատում, հետազոտություն, ռազմավարական պլանավորում, խորհրդատվություն),
3. Լավ պատկերացում ունենա հայկական մեդիա դաշտից,
4. Ունենա հետազոտական և վերլուծական լավ հմտություններ։

Մրցույթին մասնակցության փաստաթղթեր։ Մրցույթին մասնակցելու համար անհրաժեշտ է ներկայացնել հետևյալ փաստաթղթերը՝

1. հետազոտությանը ներգրավված անձի կամ անձանց CV-ները, կազմակերպության դեպքում նաև գրանցման համարը։
2. այն հետազոտությունների ցանկը, որոնք իրականացվել է ձեր կամ ձեր կազմակերպության կողմից՝ նշելով հետազոտության վերնագիրը, ժամանակահատվածը և պատվիրատուի անվանումը։
3. տեխնիկական առաջարկ, որը կներառի հետազոտության ժամանակ կիրառվելիք մեթոդաբանությունը (հետազոտությունն իրականացնելուց առաջ այն պետք է համաձայնեցնել «Հետաքննող լրագրողներ» հասարակական կազմակերպության հետ), գնահատումն իրականացնող թիմի նկարագիրը, նրանց դերաբաշխումը (մինչև 3 էջ),
4. Գնառաջարկ, որը ներառում է ծառայության ամբողջ արժեքը՝ ներառյալ հարակից հնարավոր ծախսերը։

Եթե հետաքրքրված եք հետազոտության իրականացմամբ, ապա խնդրում ենք վերը նշված փաստաթղթերը մեկ նամակով ուղարկել [email protected] էլեկտրոնային փոստին՝ նամակի նպատակ դաշտում գրելով՝ Մեդիա շուկայի հետազոտության հայտ։ 

Հայտերի ընդունման վերջնաժամկետն է 2025 թվականի հունիսի 30-ը։