ԱՄՆ նախագահ Դոնալդ Թրամփը հայտարարել է, որ Իսրայելը և Իրանը պայմանավորվել են հրադադարի շուրջ։

Թրամփի գիշերվա գրառման մեջ նշվում էր, որ հրադադարն ուժի մեջ կմտնի փուլ առ փուլ՝ դրա մասին հայտարարությունից 6 ժամ անց (Երևանի ժամանակով՝ առավոտյան մոտ 08:00-ին)։ Ինչպես Truth Social-ի իր էջում գրել է Թրամփը, այս ընթացքում երկու երկրները կավարտեն սկսված գործողությունները։

Թրամփի գրառումից հետևում էր, որ հրադադարի ռեժիմն առաջինը պետք է հայտարարի Իրանը, իսկ 12 ժամ անց՝ Իսրայելը։

«Պաշտոնապես Իրանը կսկսի ՀՐԱԴԱԴԱՐԸ (գլխատառերն ըստ Թրամփի գրառման, խմբ.), 12 ժամ անց էլ Իսրայելը կսկսի ՀՐԱԴԱԴԱՐԸ, իսկ 24 ժամ անց աշխարհը կողջունի 12-օրյա պատերազմի պաշտոնական ավարտը։ Յուրաքանչյուր ՀՐԱԴԱԴԱՐԻ ժամանակ մյուս կողմն իրեն կպահի ԽԱՂԱՂ և ՀԱՐԳԱԼԻՑ»,- գրել է ԱՄՆ նախագահը։

Իրանի արտաքին գործերի նախարար Աբբաս Արաղչին, ի պատասխան Թրամփի հայտարարության, գիշերը գրել էր, որ ներկա պահին Իսրայելի հետ հրադադարի համաձայնություն չկա։

«Ներկայում չկա հրադադարի կամ մարտական գործողությունների դադարեցման մասին համաձայնություն։ <...> Մարտական գործողությունների դադարեցման մասին վերջնական որոշումը կկայացվի ավելի ուշ»,- տելեգրամյան իր ալիքում նշել էր իրանցի պաշտոնյան։

As Iran has repeatedly made clear: Israel launched war on Iran, not the other way around.

As of now, there is NO "agreement" on any ceasefire or cessation of military operations. However, provided that the Israeli regime stops its illegal aggression against the Iranian people no…

— Seyed Abbas Araghchi (@araghchi) June 24, 2025

Մի քանի րոպե անց Արաղչին X-ի իր միկրոբլոգում հավելել էր, որ եթե Իսրայելը, Թեհրանի ժամանակով 04:00-ին (Երևանի ժամանակով՝ 04:30-ին), դադարեցնի իր գործողությունները, Իրանը պատասխան հարվածներ չի հասցնի։

Ավելի ուշ, Թրամփը նոր գրառում է արել՝ կողմերին խնդրելով չխախտել հրադադարը։ «Հրադադարն արդեն սկսել է գործել։ Խնդրում եմ չխախտել այն»,- ասել է նա ԱՄՆ նախագահը։

Իսրայելը մինչ այս պահը պաշտոնապես չի մեկնաբանել Թրամփի հայտարարությունը։

Լուսանկարը՝ Carlos Barria/AP