Անցյալ հինգշաբթի Ռոբերտ Քոչարյանի գրասենյակի ղեկավար Վիկտոր Սողոմոնյանը լրատվամիջոցներին ասել էր, թե մայիսի 24-ին Ռ. Քոչարյանը հանդիպել է ՌԴ վարչապետ Վլադիմիր Պուտինի հետ, եւ որ այդ հանդիպումը տեւել է 3 ժամ: Նույն օրը, սակայն, ռուսական «Ռեգնում» գործակալությունը, հղում անելով Պուտինի աշխատակազմի ներկայացուցչին, նշել էր. «Նման հանդիպում չի եղել»:

Ռուսական գործակալությունը չէր բացառել, որ իրականում Քոչարյանի կողմից Պուտինի հետ հանդիպում խնդրելու դեպք տեղի է ունեցել:

Երեկ, երբ Ռոբերտ Քոչարյանի գրասենյակի ղեկավարին հարցրինք, թե ինչ է նշանակում Պուտինի աշխատակազմի ներկայացուցչի հերքումը, այսինքն՝ հանդիպում իսկապես չի՞ եղել, նա պատասխանեց. «Այսինքն՝ ո՞վ է հերքել, ես անուն-ազգանուն չեմ տեսել, երբ ինձ հարցրել էին, ես հայտարարել էի, իմ անուն-ազգանունը տեսել եք, չէ՞, կարծեմ: Դե, ես ոչինչ ավելացնելու չունեմ»:

Այսինքն՝ ստացվում է, որ իրե՞նք են սուտ խոսում՝ մեր հարցին Սողոմոնյանը պատասխանեց. «Ի՞նչ ասեմ, դա արդեն իմ պրոբլեմը չէ»:

Վիկտոր Սողոմոնյանից փորձեցինք ճշտել նաեւ, թե չի՞ պատրաստվում Ռոբերտ Քոչարյանը դատի տալ «Ռեգնումին» ոչ ճիշտ տեղեկատվությամբ իր պատիվն ու արժանապատվությունն արատավորելու համար եւ որքա՞ն գումար է պահանջելու:

Զարմանալի է, բայց Սողոմոնյանն ասաց, թե նման հարց Քոչարյանի գրասենյակում չի քննարկվել: