Տեսանյութեր
Լուսանկարներ
Լևոն Արոնյանը դարձել է Freestyle Chess Grand Slam Tour մրցաշարի հաղթող
ԱՄՆ դրոշի ներքո հանդես եկող հայ շախմատիստ Լևոն Արոնյանը Լաս Վեգասում ընթացող Freestyle Chess Grand Slam Tour Ֆիշերի արագ շախմատի մրցաշարի եզրափակչում 1.5։0.5 հաշվով հաղթել է ամերիկացի Հանս Մոկե Նիմանին ու դարձել մրցաշարի հաղթող: Չեմպիոնի տիտղոսից բացի, 42-ամյա Արոնյանն արժանացել է 200 հազար դոլար մրցանակի։
«Շատ ուրախ եմ Լաս Վեգասի «Մեծ սաղավարտի» մրցաշարում հաղթելու համար։ Շնորհակալ եմ ընտանիքիս, ընկերներիս և երկրպագուներիս։ Միշտ առաջ»,- ֆեյսբուքյան էջում գրել է Լևոն Արոնյանը։
Հայ գրոսմայստերն իր չեմպիոնական ճանապարհին հաղթանակներ էր գրանցել առաջատար շախմատիստներ Մագնուս Կարլսենի, Հիկարու Նակամուրայի, Արջուն Էրիգաիսիի նկատմամբ:
2021 թվականի փետրվարին Արոնյանը հայտարարել էր, որ այլևս հանդես չի գա Հայաստանի դրոշի ներքո։ Նույն տարվա դեկտեմբերից հայ գրոսմայստերը ներկայացնում է ԱՄՆ-ն։
Այս տարբերակի հիմնական առանձնահատկությունն այն է, որ խաղաքարերի սկզբնական դիրքերը խառնվում են պատահական սկզբունքով՝ պահպանելով որոշակի կանոններ։
Ինչո՞վ է տարբերվում սովորական շախմատից
Սովորական շախմատում խաղաքարերի դասավորությունը միշտ նույնն է, խաղացողները տարբեր դասագրքային սկզբնախաղեր են կիրառում։ Ֆիշերն ուզում էր շեշտը դնել ստեղծագործական մտածողության ու տաղանդի վրա։
Թեև սկզբնական դիրքերը պատահական են, դրանք ենթարկվում են որոշակի կանոնների:
• Զինվորները սկսում են իրենց սովորական դիրքերից (սպիտակների համար՝ երկրորդ շարք, սևերի համար՝ յոթերորդ)։
• Սպիտակ և սև խաղաքարերի դիրքերը հայելային են, այսինքն՝ եթե սպիտակ թագուհին a1-ում է, սև թագուհին պետք է լինի a8-ում։
• Երկու փղերը պետք է լինեն տարբեր գույնի դաշտերի վրա (մեկը՝ սպիտակ դաշտում, մյուսը՝ սև)։
• Արքան պետք է դրվի երկու նավակների միջև, ինչը հնարավորություն է տալիս փոխատեղում կատարել։
Ընդհանուր առմամբ կա 960 հնարավոր սկզբնական դիրք, որտեղից էլ առաջացել է Chess960 անվանումը։
Լուսանկարում՝ Լևոն Արոնյանը/ ©Lennart Ootes/Freestyle Chess
Մեկնաբանել