Լոռու մարզի Արևածագ գյուղի բնակիչ Օրբել Սուքիասյանը կեսօրվա այրող արևի տակ իր սեփական սերմազտիչով  արևածագցիների ցորենն  էր զտում: Նա ասաց, որ ինքը «վափշե»  քաղաքականությամբ չի զբաղվում. «էս տեխնիկան իմն ա, սրանով իմ ընտանիքի հացի փողն եմ աշխատում»: Օրբելը  տեղյակ էր Արևածագի գյուղապետի առաջադրված 4 թեկնածուների մասին  և թվարկեց թեկնածուների անունները: Օրբելից տեղեկացանք, որ այս տարի ցորենի գործը Արևածագում նույնպես լավ չի եղել:  

Նրա կարծիքով` Արևածագը  չի զարգանում. «Մենակ գյուղապետով գյուղը չի կարա զարգանա,  կառավարությունը պիտի գյուղին կարգին նայի»,- ասաց նա:

Գյուղապետ Արթուր Հովհաննիսյանի մասին էլ Օրբելն ասաց. «Մարդ կա, որին չիմ սիրեն, մինը սիրում ա, մինը չի սիրում»:

Արևածագցիներից շատերը  Օրբելի նման գյուղատնտեսական  անբերանպաստ տարվա իրենց հոգսերով չեն ապրում: Նրանք գործը թողած` թշնամական մթնոլորտում  միմյանց դեմ արդեն մարտնչում են սեպտեմբերի 9-ին կայանալիք  գյուղապետի ընտրությունների համար:  Գյուղամիջի տաղավարում նստած արևածագցիները  գյուղապետի թեկնածուների մասին «Հետքի» հարցը լսելուն պես խուճապի մատնվեցին: Նստածներից մի քանիսը նույնիսկ արագ հեռացան տաղավարից. «Չորս հատ թեկնածու ունենք, չգիտեմ ովքեր են, գործող գյուղապետը հլա նաղդ ա»,- ասաց Ռազմիկ Հովհաննիսյանը:

Նստածներից Արարատ Հովհաննիսյանը, ով գյուղապետ Արթուր Հովհաննիսյանի եղբայրն էր,  ասաց. «Չորս թեկնածուներ են, իհարկե, լավ է, որ շատ են, տոչնի չգիտեմ` ովքեր են»:

Երբ դեմքով շրջվեցի դեպի տաղավարում նստածներից մեկը,  նա պոռթկաց. «Ինձ էդ հարցը պետք չի տալ, գնա գյուղապետին ասա, մեկ էլ իրա տեղակալներին»:

«Ինչո՞ւ, Ձեզ  որպես ընտրող չե՞ն հետաքրքրում թեկնածուները»,- հարցրի նրան:

«Գործ չունեմ ես: Փողը տուր` ընտրեմ: Դու քեզ հմա ուզում ես գեղապետ դառնաս, ես էլ անփող քեզ ընտրիլ տեմ, հա», -ասաց արևածագցի տղամարդը, ով հրաժարվեց հայտնել ազգանունը, իսկ լուսանկարելիս դեմքով շրջվեց:

Արևածագի գյուղապետարանի հաշվապահ Ռուզանը բացատրեց, որ  ընտրությունների հետ կապված գյուղում ահավոր վիճակ է ստեղծվել. «Այս օրերին  մարդիկ վախենում են միմյանց հետ խոսել: Այդ պատճառով էլ գյուղամիջում անտեղյակ են ներկայացել»,- ասաց նա:  

Գյուղապետարանի աշխատակազմի ղեկավար Սիլվա Բաղդասարյանն էլ «Հետքին»  հայտնեց, որ գյուղապետի թեկնածու են առաջադրվել 4 արևածագցիներ: Նրանցից  2-ը` այդ թվում  գործող գյուղապետ Արթուր Հովհաննիսյանը  և Պավլիկ Մելիքսեթյանը Հանրապետական կուսակցության անդամ են: Թեկնածու Սամվել Սարգսյանը  ԲՀԿ անդամ է, իսկ  Արկադի Հովհաննիսյանը անկուսակցական է:  

Արևածագի գյուղապետ և գյուղապետի թեկնածու Արթուր Հովհաննիսյանին «Հետքին» չհաջողվեց հանդիպել գյուղում: Աշխատակազմի ղեկավարը հեռախոսով ճշտեց, որ  նա Վանաձորում է, մարզպետի ընդունարանում սպասում է ընդունելության:

Թեև մինչև աշխատանքային օրվա ավարտը Արևածագում էինք, սակայն գյուղապետը չվերադարձավ գյուղապետարան, իսկ գյուղապետարանում աշխատանքն ավարտվեց և դռները փակվեցին ժամը 16:00-ին:  Արևածագում  գրանցված է 900 բնակիչ, փաստացի բնակվում է մոտ 800 -ը,  գյուղը 620 ընտրող ունի, որից 150-ը բացակայում է գյուղից. «Ընտրություններին սովորաբար մասնակցում են  450-470 ընտրողներ»,- ասաց աշխատակազմի ղեկավարը:

Հաշվապահ Ռուզանն էլ ասաց, որ 4 տարի առաջ գյուղապետի նախկին ընտրություններին ԲՀԿ-ական Սամվել Սարգսյանը 25 ձայնի տարբերությամբ է պարտվել գործող գյուղապետ Արթուր Հովհաննիսյանին. «Սարգսյանները Արևածագում մեծ ազգ են»,- բացատրեց Ռուզանը:

Սամվել Սարգսյանին հանդիպեցինք Արևածագի փողոցներից մեկում: Նա հրաժարվեց մեզ հետ զրուցել. «Հա, ժամանակը կգա, զրից կանենք: Հմի չեմ կարալ: Չէ, չեմ ուզում խոսել, որ ժամանակը գա, ես կգամ Ձեզ մոտ:  Ես ԲՀԿ-ն եմ ներկայացնում: Ես կգամ Ձեզ մոտ, մենք կզրուցենք: Ես էս գյուղի ամեն ինչն էլ գիտեմ: Դուք նախ գյուղի թերությունների մասին իրանից հարցրեք, նոր ես կասեմ»,- ասաց ԲՀԿ-ի  թեկնածուն:  

Հեռախոսով մեզ հետ զրույցում հանրապետական Պավլիկ Մելիքսեթյանն  ասաց, որ ինքնառաջադրմամբ է դարձել գյուղապետի թեկնածու: Նա գյուղի բոլոր հիմնախնդիրները չլուծված համարեց. «Գյուղում ընդհանուր մթնոլորտը շատ վատ է, այդ պատճառով էլ առաջադրվել եմ գյուղապետի թեկնածու: Եվ դա իրա մեղքով ա»,- գյուղապետ Արթուր Հովանիսյանին մեղադրեց  թեկնածու Պավլիկ Մելիքսեթյանը:  Արևածագի փողոցներում շրջելիս գյուղացիները տեղեկացրին, որ թեկնածու Սամվել Սարգսյանը ԲՀԿ-ի օժանդակությամբ արդեն  ընտրողներին դիզվառելիք է բաժանում:  Չխոսող թեկնածուին այլևս չկարողացանք գտնել պարզաբանում ստանալու համար:   

Արևածագցի Դուրմիշ Դավթյանը գտնում է, որ ընտրություններին Արևածագում ամենքը մի ձևի են վերաբերվում. «Գյուղի վիճակը լավն էլել չի, ըլիլ էլ չի»:  Գյուղապետ Արթուր Հովհաննիսյանի և արևածագցիների հարաբերության մասին Դուրմիշն ասաց. «Ով գիտի: Մինը սիրում ա, մինը չէ: Գեղապետը մնի հմա լավ ա, մնի հմա չէ:  Էս պուճուր գեղըմը 4 թեկնածու չտեր ըլիլ:  Կարան մի 2-ն էլ դնեն: Էսքան չի կարելի, հետն էլ ժողովրդից նեղանում են: Լարված վիճակ է գյուղում»,- ասաց Դուրմիշ Դավթյանը:

Երկար որոնումներից հետո մեզ հաջողվեց հանդիպել նաև գյուղապետի անկուսակցական թեկնածու Արկադի Հովհանիսյանին: 

Նա ասաց, որ մասնագիտությամբ անասնաբույծ է, զբաղվում է հողագործությամբ և մեղվաբուծությամբ: Երկու հեկտար  հող է մշակում: Ասաց, որ Արևածագի հիմնախնդիրները շատ են. «Իմ նախընտրական ծրագրերն արդեն պատրաստել եմ ընտրողներին ներկայացնելու համար: Գյուղի վերին թաղերում խմելու ջրի խնդիր ունենք: Արևածագը ոռոգման ջուր ունի, սակայն բոլորին չի բավարարում»,- ասաց  թեկնածուն:  Արկադին Արևածագի առաջնահերթ խնդիրը, այնուամենայնիվ, համարեց գյուղի անմիաբանությունը. «Սա  մեր գյուղի ամենակարևոր հարցերից մեկն է:  Եթե  մենք կարողանանք  միահամուռ լինել,  անպայման գյուղի համար շատ հարցեր կլուծենք»,- ասաց նա:  

Արկադին  գտնում էր, որ դա  չի կարելի միայն գյուղապետ Արթուր Հովհաննիսյանի անձով պայմանավորել, քանի որ գյուղի լարվածությունը միշտ էլ եղել է: Թեկնածուն   գյուղապետ ընտրվելու սպասելիքներ ուներ «Էս գյուղը իմ ընտանիքն է,  յուրաքանչյուր անդամ էլ իմ ընտանիքի անդամներից մեկն է:  Գյուղապետ կընտրվեմ, չեմ ընտրվի, բոլորի ցավը և ուրախությունը իմն եմ համարում և փորձում են նրանց հետ ինչ-որ ձևով կիսել»,- ասաց  Արկադի Հովհաննիսյանը:  Անմիաբան և 4 մասի բաժանված Արևածագում  սեպտեմբերի 9-ին գյուղապետի լարված ընտրություններ են սպասվում: